"مارو_العاب الرحمه"
للكاتبه/لينا بسيوني
الفصل الرابع بعنوان
"عضم فيران"
"نورا"
اول حاجه لفتت نظرنا الاهرامات واللي كان لونها ابيض وبتلمع في ضوء الشمس، انعاكس صورتها كان ظاهر علي سطح مياه النيل كانه مطبوع فوقيها، الشوارع نضيفه جدا والتماثيل الكبيبرة والمسلات وبتتنقل فوق الشجر والنخل اللي محاوط المنطقه كلها.
المنطقه كانت مفعمه بالحركه والحياه، والناس اللي ماشين في الشارع شكلهم ولبسهم غريب، رجاله وستات حاطين علي وشهم مساحيق تجميل ومكحلين عينيهم واغلبيتهم قرع.
سالت مارو:
هو ليه الناس كلها قرع؟!
رد وهو متنح ومذهول زيي:
حلاقه الشعر بالكامل شكل من اشكال النظافه عند الفراعنه، اغلبيه الرجاله والستات بيحلقوا شعرهم عشان يتجنبوا القمل والحشرات والاغنياء منهم بيلبسوا باروكه عشان تحمي صلعتهم من الشمس.
هزيتله راسي وانا عيني علي القطط اللي في كل حته والناس اللي بتوسعلهم الطريق في احترام وتبجيل، اتذهلت لما لاقيت قطه قربت من طفل بيلعب مع اصحابه في الشارع، خبطت علي رجله بايدها،
الطفل التفت ليها، وطي وقرب ودنه منها واتفاجئت بالقطه بتوشوشه في ودنه، الطفل راح ناحيه بيت، دخل فيه وخرج في ايده طبق لبن، حط الطبق قدامها، فهزيتله راسها
نغزت مارو وقلتله:
خدت بالك؟؟! دول بيكلموا القطط!!
رد:
انا خدت بالي انهم بيكلموا الطيور!!
قلتله باستغراب:
دة سحر صح؟!!
قالي:
الفراعنه كان عندهم علوم كتير منعرفش عنها حاجه ولا قادرين نكتشف سرها، علي ما اعتقد ممكن يكونوا وصلوا للغه او وسيله يتواصلوا بيها مع الكائنات دى خاصه انهم قدسوهم ورسموهم علي معابدهم.
سالته:
يعني ده علم مش سحر؟!
رد وقالي:
بصي عامه كل العلوم هنا بيقولوا عليها سحر، كيمياء، فيزياء، طب، اي علم عند الفراعنه بيطلق عليه سحر.
سالته وانا بشارو علي كذا حد معدى جنبنا:
ايه الاكياس القماش اللي معلقينها في رقبتهم دى؟!
رد قال:
علي ما اعتقد الاكياس دى فيها عضم فيران!!
قلتله باستغراب:
عضم فيران؟!!
وضح وقال:
انا قريت قبل كده انهم كانوا بيعلقوه في رقبتهم لاسباب كتير منها علاج امراض زى الام العظام ومشاكل فروه الراس غير انهم بيعتقدوا انه بيساعد الرضع علي التسنين وبيعالج التبول اللاارادي للاطفال.
شوفت رجاله لابسين لبس مختلف عن باقي الناس وماسكين عصيان وفي ايديهم سلاسل مربوط فيها قرود!! شاورت عليهم وسالت مارو:
مين دول؟!
قالي:
علي ما اعتقد دول الشرطه.
سالته باستغراب:
ايه ده هم كان عندهم شرطه؟!!
قالي:
طبعا المصريين القدماء اول من اسسوا نظام الشرطه.
سالته:
طب العصيان اللي في ايديهم وفهمنا ليه!! انما ايه لازمه القرود اللي معاهمدى؟!!
رد وقال:
بيدربوها زى الكلاب البوليسيه، بيطاردوا بيها المجرمين ويقبضوا عليهم.
بصيت باستغراب عليهم وقلتله:
غريبه اوووى!!
قالي:
اومال لما تعرفي ان القرود هنا شركاء للانسان في النهضه وبناء الحضارة، بيشتغلوا معاهم في رى الارض والزراعه وجمع المحاصيل والتسليه والرقص
قلتله وانا مندهشه:
وااااو....
مارو بص علي البيوت وقالي:
خدتي بالك ان علي كل ابواب البيوت في حجاب لمنع دخول الاروح الشريرة، والشياطين.. الترند هنا السحر.
سمعنا ماما سندس بتقول:
هو احنا هنفضل ماشيين كده كتير.. انا جعانه ومالحقتش اتعشي!!
بابا رد عليها وقال:
ومين سمعك!!، منها لله شقايا علي الارض.
حنوش قال:
المشكله مش في الاكل والشرب دة عادى ممكن نتصرف فيه، المشكله في السكن، لازم نستقر في حته علي ما نعرف هنخرج من الورطه دى ازاي!!
بابا نغزني في ضهرى وهو بيقولي:
حلو اللعب في السحر يابه!! اديكي شردتينا، اتفضلي بقي شوفيلنا حته نبات فيها.
لسه هرد عليه، لقيت عمو حنوش بيقولنا:
تعالو ورايا بسرعه.
مشينا وراه فدخلنا حارة صغيرة طلعنا منها علي ساحه كبيبرة وزحمه جدا، سوق مليان ناس بتبيع وتشترى، فول، عدس، قمح، عسل، فواكهه وخضار، السحره كان ليهم حضور قوى في السوق، علي كل جانب كان فيه ساحر واقف بيعمل خدع والناس ملفوفه حواليه، شوفت ساحر بيرمي حزامه الجلد علي الارض فالحزام اتحول لافعي كبيبرة، ساحر تاني بيقطع راس غراب وبيفصلها عن جسمه، راس الغراب اتنططت علي الارض ورجعت تاني علي
جسمه بعدها الغراب رفرف بجناحاته وطار بعيد!
لفت نظرى ساحر متجمع حواليه ناس كتير، الساحر واقف وجنبه ثور ضخم، الساحر قرب علي الثور وهو في ايده سيف، نزل علي رقبه الثور بالسيف فراس الثور اتفصلت عن جسمه ووقع علي الارض، الدم اتنطر في كل حته، شويه والساحر قرب من الثور، تمتم بكلمات وادى ضهره للثور ومشي.
الثور قام ورقبته بتنزف دم ومشي ورا الساحر من غير الراس! الناس اللي كانوا حوالين الساحر سقفوا بحرارة وهم بيحيوه علي خدعته.
قلت لمارو وانا مذهولة:
السحر منتشر هنا بطريقه رهيبه!!
مارو قالي:
مش قلتلك ترند، علشان كدا ربنا ارسل ليهم سيدنا موسي بمعجزات في السحر، وكذلك السيد المسيح ربنا ارسله بمعجزة احياء الموتي وابراء الابرص والاعمي لان قومه اشتهروا ببراعتهم في الطب وسيدنا محمد ارسل بمعجزة القران وبلاغته للعرب واللي كانوا مشهورين بالفصاحه والبلاغه.
سالته:
معني كدا ان كل الناس هنا بيمارسوا السحر؟!
رد:
اغلبيتهم بيمارسوا السحر بدرجات، في سحر العامه او السحر الدفاعي واللي بيستخدموه لطرد الارواح الشريرة وعلاج الامراض والسحر الترفيهى زى اللي انتي شيفاه وده غير سحر الكهنه اللي مش متاح للعامه وكان بيتنقل ما بين الكهنه بس لانه سحر قوى جدا وبيعتبروه من الاسرار.
بعد انتهاء عصر الكهنه بدخول الاديان السماويه وقف نقله موصلناش منه اي حاجه تقريبا.
سمعت نصير بيقول لبابا:
انا هروح اسرق اكل واجيلكم تاني!!
بابا قاله وهو بيحذره:
اياك تسرق اكل، احنا متفقين مش هنستخدم السحر في حاجه غلط، السحر في الخير بس.
نصير قاله:
براحتك انا عامل عليكم انتوا، انا عن نفسي هروح اسرق!! وبعدين ما انا سارق الهدوم اللي مراتك وعيالك لابسيتها دى.
نصير خد حنوش في ايده وهو بيقول:
يلا يا حنش!!
ماما سندس قالت لبابا:
انا جعانه اووى يا سيدى واحنا مضطرين، مش مشكله لو سرقنا المرة....
قطع كلامها وقال بحزم:
ابدا.. عمرى ماهخلف وصيه جدي مهما كانت الظروف.
شويه وحنوش ونصير ظهروا وفي ايديهم اكل، عيش وفاكهه.. عنب، تين، برقوق.
نصير فرط عنقود العنب قدامنا ورمي كام حبه في الهوا، لقطهم في بوقه قبل ما يقعوا علي الارض وقالنا وهو بيتمزج وبيغظلنا:
ياسلام!! العنب علي اصله مش اللي مرشوش كيماوى، حاجه اورجانيك خالص.
ووجه كلامه لبابا وقال:
قولي يا نينو هتتصرفلنا ازاي في الاكل والسكن،؟!! اصلي مش متعود علي قاعدة الشارع.
بابا رد:
هشتغل واكسب من عرق جبيني.
نصير ساله بتهكم:
وهتشتغل ايه ان شاء الله؟؟! مهندس كهربا!!
بابا رد:
هشتغل زى ما كنت شغال.... معالج بالقران!!
نصير ضحك وقال:
اولا انت مبتاخدش فلوس في الخير، وبتعالج الناس ببلاش.. ثانيا القران لسه مانزلش اصلا!!
فلتت مني ضحكه فماما سندس اديتني بالقفا، افتكرت مارو فبصيت عليه، لاقيته اختفي من وسطنا، سالتهم:
هو مارو فين!!؟
اتلفتوا يمين وشمال وهم بيدورا عليه، مالقهوش.
نصير وحنوش اختفوا عشان يدوروا عليه، بعدها بشويه رجع حنوش وقالنا وهو قلقان:
انا لاقيت مارو........ مش هتصدقوا لاقيته فين!!
يتبـــــــــــع......
