"مارو_العاب الرحمة"
للكاتبه /لينا بسيوني
الفصل الخامس بعنوان"مصارعه"
سألناه كلنا في صوت واحد:
فين؟!
رد عمو حنوش:
في اخر السوق... ماتيجوا نشوف احسن.
مشينا بسرعه ورا عمو حنوش، لحد ماوصلنا لاخر السوق
اتصدمنا لما لاقينا مارو واقف وسط حلبه مصارعه.
بابا جرى ناحيه الحلبه وهو بيوسع في الناس اللي ملمومه حواليها لحد ماوصل للصفوف الاولي
حاول ينط في الحلبه فحارس من اللي بينظموا الناس منعه،
بابا قاوح معاه وهو بيقوله:
اللي جوة الحلبه دة ابني!!
الحارس قال كام كلمه بالهيروغليفي ورفع الكورباج علي بابا وكان هيضربه بيه. فبابا تفادى الضربه ورجع لورا.
بابا نادى علي مارو بصوت عالي بس مارو مخدش باله من بابا اللي بينادى عليه
كان مركز نظرة ناحيه بوابه مقفوله في اخر الحلبه، البوابه اتفتحت وظهر ثور ضخم بقرون طويله وعين حمراء زى الجمر.
اول لم بابا شاف الثور اتنطط في مكانه وفضل ينادى علي مارو بصوت عالي، مارو اخد باله ان حد بينادى عليه وفضل يدور علي مصدر الصوت وسط الناس اللي واقفه، لحد ماشاف بابا وهو بيتنطط وسط الناس وبيشاورله.
مارو شاور لبابا وهو مبتسم، الثور كان بيحفر الارض برجليه وبيستعد للهجوم.
بابا قال لمارو بصوت عالي:
واد يا مارو بتعمل ايه عندك؟!
مارو بص لبابا وقاله وهو مبسوط:
اللي هيوقع الثور علي الارض هياخد ثلاث عملات ذهبيه ماتقلقلش يا والد...........
صرخنا كلنا في صوت واحد وقولنا:
حاســــــــــــــــــــــــــــــــــــــــــــــــــــب.......
الثور هجم بسرعه رهيبه ونطر مارو بقرنه، مارو طار في الهوا واترزع علي الارض، كل اللي كانوا حوالين الحلبه قالوا لااردايا"
اووووووووووووه.
ماروقام من علي الارض، نفض هدومه وهو مبتسم وقال للثور:
انت متاكد انك ثور مش بقرة.
حسيت الثور فهم كلام مارو وغضب فحفر الارض بحوافره استعداد لهجوم تاني وانطلق بسرعه رهيبه ناحيه مارو علشان ينطره بقرونه لكن اتفاجأ بمارو مسكه من قرونه وثبت راسه في الارض، الثور كان بيحاول يزق مارو لكن مارو كان مثبت رجليه في ارضيه الحلبه زى الوتد، الثور حاول يحرك راسه يمين وشمال علشان يحرر قرونه من قبضه مارو، فشل تمامأ، قواه خرت وبدا يتعب، مارو لما لقي الثور فرهد، ثبتهمن قرونه بايد واحدة ونزل علي راسه بكوع ايده الثانيه، ضربه مرة في التانيه في التالته لحد ما الثور اغمي عليه تمامأ، ومبقاش بيتحرك.
الجمهور اللي حوالين الحلبه كانوا بيسقفوا بحرارة وهم مبهورين بقوة مارو.
مارو خرج من الحلبه وفي ايده ثلاث عملات ذهبيه، بابا فضل يحضن فيه ويبوسه، عينه دمعت وهو بيقول بفخر:
انا مخلفتش غير ده!!
ماما سندس قالت كالعادة:
الجنيه عرفت تربي، مش زى ربيت جلابه الخراب!!
وطبطبت علي ضهر مارو وهي بتبص علي العملات اللي في ايده.
قربت من مارو وقولتله:
وريني كده يا مارو العمله شكلها عامل ازاي!!
اداني العمله، بصيت علي وشها وجيت اقلبها علي ضهرها وقعت من ايدى فضلت تكر قدامي وتجرى.
جريت وراها وانا بخبط في رجلين الناس اللي ماشيه في السوق، العمله فضلت تكر وتعدى من بين رجلين الناس وانا وراها، جريت بسرعه علشان اسبق العمله فخبطت في راجل كان ساند علي عصايه ووقعته علي الارض، فضلت مكمله لحد ما سبقت العمله ونجحت اني امسكها، مسكتها ورفعتها في السما وانا بقول بحماس:
يسسسسسس!
لفيت بضهرى وببص ورايا، اتصدمت لما شوفت حرب قايمه بين اهلي وبين كتيبه من جيش الفراعنه!!
يتبـع......
![](https://www3.0zz0.com/2024/05/26/06/919983638.jpg)
![](https://www3.0zz0.com/2024/05/24/17/749409247.jpg)
![](https://www12.0zz0.com/2024/05/23/19/529447582.jpg)