رواية وردتي السوداء الفصل الثامن 8بقلم سمية عامر

رواية وردتي السوداء الفصل الثامن بقلم سمية عامر

راح الظابط سلم علية : معلش انت لازم تيجي معايا انت عارف القانون

ضحك وهو بيبصلها : اه طبعا طبعا يلا

فرحت هي و حضنت الدكتورة : انا متشكرة جدا

راحت نورين معاهم و اول ما وصلوا قسم الشر"طة كانت شمتانة فيه :انت فاكر البلد مفيهاش قانون ولا ايه دلوقتي تشوف هيعملو فيك ايه

قرب منها و همسلها : حسابك في البيت

الظابط للعسكري: هاتلنا غدا يابني و زود سلاطات و بيبسي

نورين بتوتر : غدا اه لازم تتغدوا عشان تعرفوا تحاكموه

بعد عبد الملك مع الظابط و فضلوا ياكلو و هي قاعدة بعيد مصدومة

قام عبدالملك : شريف هستناك انهاردة في البيت و ابقى جيب الاولاد

- ماشي يا ابن العم بس خليها بكره و بلغ عمي سلامي

قرب عبدالملك منها

اتوترت اكتر : هو .. ابن عمك .. انتو قر... قرايب

- يلا امشي قدامي

مش ماشيه قدامك و مش راجعة في حته

شدها عليه : لينا بيت نتكلم فيه

عيونها دمعت :سيب ايدي انت بتوجعني

ساب ايديها و مشيت قدامه لوحدها لحد ما ركبوا العربية و رجعو البيت

فضلت قاعدة في العربية مبتتكلمش و مش عايزة تنزل

- انزلي !!

لا و انا عايزة اروح لبابا في القاهرة

- انسي ، اللي بتدخل بيت جوزها تسمع كلامه لحد ما تدخل تربتها

عملت نفسها مسمعتش : انا مش نازلة خليني قاعدة هنا لحد ما اموت

- خليكي براحتك

سابها و دخل و بعد ما فضلت تعيط شويه خرجت من العربية و دخلت كان البيت فاضي مهتمتش و كملت طريقها لحد اوضتها اللي لقيت بابها اتصلح

ضحكت باستهزاء

" ليت قلوبنا يصلحها من افسدها و تعُد كما كانت أو لربما افضل "

دخلت و قعدت على طرف السرير تعيط و تحط ايديها على قلبها

بس فجأة حست ب ايد على كتفها : انا اسف على اللي عملته

بصتله و عيطت اكتر و معرفتش تعمل ايه غير أنها حضنته و انهارت وسط دموعها : انا بس معملتش حاجه عشان تعمل فيا كل ده حتى اني مش لاقيه حد يحبني أو يقف جنبي كل حياتي و انا لوحدي

حس بوخذ في قلبه : طيب اهدي و اللي انتي عايزاه عمله

فضلت تعيط اكتر و تترعش : مش عارفة بس انا حاسه اني مش عايزة حاجه غير اني احس بنفس الاحساس ده طول عمر الشعور بالأمان اللي انا حاسه بيه و انا في حضنك مع انك اذيتني انا عمري ما حسيته ... انا بس محتاجة اللحظة دي تستمر متمشيش فاهمني ؟

ضمها اكتر و قلعها الحجاب و فضل يملس على شعرها : انا اسف على كل حاجه وعد مش هعمل كده تاني

نامت في حضنة وهي مستسلمة لتعبها و حزنها اللي احتل قلبها

.....

صحيت تاني يوم وهي لوحدها في السرير و جنبها ورقة : صباح الفل اصحي و افطري عشان عاملك مفاجأة

ابتسمت بس بألم لأنها عارفة أنه أشفق على حالتها امبارح

فطرت و لبست فستان زهري و حجاب و خرجت للجنينة كان مستنيها

قعدت على الكرسي وهو قعد جنبها : عاملة ايه دلوقتي

- كويسة ، في ايه ؟

ابتسم و بصلها بعمق : جاهزة تسافري تكملي باقي دراستك برا ؟ و انهاردة اي طلب ليكي هوافق عليه

حست بوخذ اكتر في قلبها و ابتسمت بحزن اكبر و عيطت : عندي طلب واحد بس ..

- ايه ؟؟

طلقني .......