روايه جبروت انثي وسطوة رجل الفصل الثاني والعشرون 22 بقلم الاء عبدالرحمن
22
نور بصت لجدها : هتجاوب بصراحة
سامي قلق منها :هههه بنتك هتخوفني يا نبيل ولا ايه
نور :بتكلم جد يا جدي
سامي :عايزة ايه اسألي
نور : اسم ست حبيتها ومقدرتش تنساها
سامي وكأنه كان عارف هي هتسأل ايه
سامي بص لباب القصر كانت مروى :الست الي على الباب دي
الكل بص ناحية الباب
نور اتصدمت جدا وجريت عليها :خالتوا انتي كويسة في حاجة
مروى وعينيها على سامي :كويسة جدا
نور باستغراب وصوت مهموس :في ايه
مروى :هتعرفي دلوقت
مروى دخلت
نبيل باستغراب :اهلا يا مروى ازيك
سامي قرب منها وعينيه فيها لمعة غريبة وبص لكل الموجودين : يمكن هتستغربوا الي هقولوا دلوقت لكن الست دي هي الست الوحيدة الي حبيتها في حياتي كلها الست الي خطفة قلبي من زمااان قووي الست الوحيدة الي معرفتش انساها للحظة وحدة
الست الي كنت اتمنى تبقى على ذمتي حتى لو ليوم واحد
مروى كانت بتبصله ببرود وغموض
نور وندى وكل الموجودين مصدومين
كارما قربت من فريدة :دي باين هتكوش على كل حاجة الحقي نفسك يا عبيطة
سامي بص لمروى بابتسامة وفرحة : انا ومروى هنتجوز
طبعا الجميع كان مصدوم وفاتح بوقه😳
كامل :ايه الي بتقولوا ده يا بابا
نبيل باستغراب :ازاي
فريدة بغضب :مستحيل ايه الي بتقولوه ده
سناء ضحكت بسخرية :لسه ياما هنشوف
نور بصت لمروى الي متقمصة الا مبالاة ببراعة
مالك بهزار :ايوووه يا نمس وانا اقول جايبين الشقاوة دي منين
ادهم قرب من جده :مبروك يا حج
ندى قربت من ادم : الاتنين دول لو اتجوزوا احنا هناكل ضرب
ادم كتم ضحكته:اخرسي يخرب بيتك
مازن بهمس مصحوب بسخرية وصل لسيرين :لا ده باين العيلة كلها ملعوب بشرفها لا نسب يعر بصحيح
سيرين بصتله بغضب
مازن :هه حيلك لا تفرقعي دلوقت
سامي بصلهم :خلصتوا ومسك ايد مروى الي اترعشت اول ما مسكها
احنا هنكتب كتابنا بكره وبصلها
وهتيجي ست البيت تنوره
نور بصت لخالتها :ايه الي بيحصل يا خالتوا انتي موافقة على الكلام ده
مروى ببرود :ايوه موافقة
ندى بتهور :طيب ما تجيبوا المأذون دلوقت ويبقى خير البر عاجله
سامي بصلها بلهفة :ايه رائيك يا مروى
مروى ببرود :مش فارقة
سامي غمز ادهم
ادهم :نص ساعة ويكون هنا
نادر :ايه يا جدي ده الحب مولع المكان
سامي :اخرس يله
قعدوا كلهم يستنوا المأذون على ما ييجي ونور متجننة مش فاهمة
سامي قرب من مروى :انتي كويسة عايزة حاجة
مروى باقتضاب :لا انا تمام كده
سامي بابتسامة :هتنوري حياتي هتبقي الملكة هنا كل الي عايزاه قبل ما تفكري فيه يتنفذ مفيش حد هيقدر يتنفس معاكي
مروى طنشته
مالك كان بيبصلها باستغراب وبيبص لوالده كان دايما يقوله عمره ما حب ست غير والدته
ازاي دلوقت بيقول عمره ما حب غير الست دي
جه ادهم ومعاه المأذون
نور اتجننت وهي بتجز على سنانها :خالتوا عايزاكي لو سمحتي
مروى :بعدين
نور بغيظ :دلوقت يا خالتوا دلوقت
ادهم قرب من نور ومسك ايدها شد عليها :بصي لفرحة جدو وسيبيهم يعيشوا اخر حياتهم مع بعض
نور بصتلهم بغضب ونزعت ايدها من ادهم لانها عارفة وفاهمة خالتها عايزة توصل لايه
خالتها عايزة تدهور العيلة وتشتتها
اتكتب الكتاب تحت غضب البعض وفرحة البعض
سامي قرب من مروى الي بعدت عنه بقرف
سامي تحامل نظرتها دي :نورتي حياتي
مروى ابتسمتله بمجاملة
فريدة بغيظ :ايه يا عمي هتاخد العروسة وتروح على فين
مروى بصتلها بسخرية :وانتي مالك يا فريدة يهمك في ايه تعرفي
فريدة اتجننت
سامي مسك ايدها :عن اذنكم هنطلع اوضتنا
مروى طلعت معاه بصمت رهيب ونور متجننة
سابتهم وطلعت اوضتها
ومازن وسيرين روحوا
وندى وادم طلعوا اوضتهم
نبيل :هروح لمنال لوحدها في البيت
نادر قرب منه :بابا وماما برضه لوحدها
نبيل :نادر انت مش فاهم حاجة
نادر :طيب لو مش فاهم فهمني يعني ايه ابويا الي متعود على وجوده في البيت دايما فجاءة بعد اما ظهرت مراته الاولى ما بقاش يقعد في البيت نهائي طيب ماما ملهاش خاطر عندك نسيت كل حاجة عملتها على شان
نبيل ربت على ظهره بحنيه :امك من زماان قوي قفلت كل السكك بيني وبينها انا كنت معاها بس على شانك انت وسيرين وانتوا دلوقت كبرتوا فمن حقي اعيش مع الانسانة الي قلبي بيدقلها وساب ابنه ومشي
..............................................
عند فريدة
كانت متجننة ازاي مروى تتكلم معاها كده قدام الجميع
كامل :ما تهدي كده انتي الغلطانة ازاي تتدخلي ما بينهم
فريدة بغضب :مهو انا لو ليا راجل يدافع عني محدش هيقدر يتكلم معايا ربع كلمة
شوف اخوك نبيل محدش بيقدر يفتح بوقه على مراته قدامه
كامل بسخرية :والله لانه مراته محترمة وما بتتدخلش في حياة حد
ولو عيدتي كلامك ده من تاني مش هيحصل كويس فاهمة انخمدي نامي بلا قرف
فريدة اتجننت منهم كلهم واتوعدتلهم
...................................................
عند مازن
دخل الاوضة بدل هدومه
دخلت سيرين خدت شاور وخرجت
مازن بصلها بسخرية :لكن ايه العيلة دي يا سيري تعر بصحيح
سيرين طنشته
مازن رفع حاجبه :مش بكلمك
سيرين ببرود :عايز ايه يا مازن ضايل حاجة جارحة ما قولتهاش عايز تقولها اتفضل انا سامعاك
مازن :ههههههه لا يا بت على اساس يعني بتحسي وبتتجرحي
سيرين طنشته وخدت ملاية وكانت هتنام على الكنبة
مازن مسك دراعها :رايحة فين
سيرين بنفاذ صبر :هنام هعمل ايه يعني
مازن وهو بيبصلها بنظرات سيرين فهماها كويس : ما تناميش ليا مزاج ليكي النهاردة
سيرين بصتله بغضب :ايه الي بتقوله ده انا مراتك على فكرة مش واحدة جايبها من الشارع
مازن قرب منها وهو بيقبل وشها :لا انا ما جبتكيش من الشارع اتا جبتك من اوضة نومي في التجمع لهنا
سيرين بعدته عنها وبصتله بدموع :كفايا يا مازن كفايا ارجوك كفاية اهانات انا ما بقتش قادرة استحمل اكتر من كده
انت محسسني اني خنتك او كنت لغيرك انت الوحيد الي سلمتك نفسي لاني حبيتك حبيتك بهد كلامك المعسول ليا
فين كلامك فين حبك فين لهفتك ليه توصلنا لكده
مازن كان بيبص لانهيارها ببرود :خلصتي التمثيلية دي
سيرين بقهر :تمثيلية
مازن زقها السرير
سيرين بدموع هتعمل ايه
مازن وهو بيقرب منها :هعمل حاجة مش جديدة عليكي
وقرب يقبلها بعنف وهي بتحاول تبعده وما قدرتش استسلمت لرغبته وهي مقهورة ودموعها بتنزل على حب موهوم
.............................................
عند مروى وسامي
دخل سامي الاوضة وهو مش مصدق الي حصل
سامي :تصدقي اني حاسس اني في حلم ومش عايز اصحى منه
مروى بصتله بقرف :اوعى تصدق الي حصل تحت
سامي مسك ايدها بلهفة :انا مش عايز منك حاجة وكفايا عليا انك معايا دلوقت انتي ما تعرفيش اللحظة دي تعنيلي ايه حاسس اني ملكت العالم كله بين ايديا
مروى ببرود :هتقوله امتى
سامي :يومين وهو لوحده هيعرف ما تخافيش
سامحيني يا مروى سامحيني انا بحبك
مروى :اسامحك على ايه ولا ايه على اغتصابي ولا على قتلك لخطيبي ولا على تشويهك لسمعتي ولا على ابني الي حرمتني منه وفهمته اني ميته ولا على اجبارك ليا النهاردة اني اقبل اتجوزك
قولي اسامحك على ايه ولا ايه
سامي بغضب :كل حاجة عملتها انتي كنتي السبب فيها انا مجنون مجنون فيكي بعشق ريحتك انتي الحلم الي بتمنى اوصله وانتي الي حرمتينا من انه نتمتع في حياتنا بسبب عنادك
لكن دلوقت خلاص انتي مراتي
مروى :تمام يا سامي وانا موافقة لكن مراتك على الورق مش هتقربلي
سامي بلهفة :وانا موافق اهم حاجة وجودك جنبي
مروى :اتفاقنا ده محدش هيعرف عنه حاجة ولا حد هيعرف سبب الجواز حتى ادهم
سامي :موافق
مروى :الي اقوله في القصر يتنفذ وخاصة مع الي اسمها فريدة
سامي :تؤمري انتي ست البيت ده
مروى :تمام كده
سامي بهزار :ما تقتليني بالمرة
مروى ببرود :نفسي
ومشيت ناحية السرير وندهت للشغالات يغيروا ملايات السرير وخرجوا
سامي :هما يوميا بيغروهم على فكره
مروى بقرف :عارفة لكن مش عايزة انام على حاجة ريحتك فيها
سامي بغضب :مروى اعدلي لسانك
مروى :خلصت كلامك انا عايزة هدوم مش جايبة معايا حاجة
سامي :وانا اعمل ايه يعني
مروى :بتتكلم جد انزل جبلي هدوم
سامي بص حواليه :بتكلميني انا عايزاني انا انزل اجيبلك هدوم دلوقت
مروى بخبث :اماال مش جوزي ولا انزل اطلب من ولادك مثلا يجيبولي ويتخيلوني بالهدوم زي ما كنت تعمل زمان
سامي بتفكير وغيرة :هاه لا هنزل انا وامري لله
سامي نزل ومروى بتتوعدله :ان ما وريتك يا سامي الكلب مبقاش مروى ان ما ذليتك بكيد النسا
........................................
عند نور
خدت شاور وبدلت هدومها وهي متجننة ضربت على خالتها اكتر من مرة ما ردتش
دخل ادهم :مساء الخير
نور ببرود :اهلا
ادهم خد شاور ولبس بجامة مريحة وخرج وقعد جنبها :في ايه مالك شايلة طاجن ستك ليه
نور طنشته
ادهم مسك دراعها :مش بكلمك انا
نور بصت لايده الي على دراعها :ايدك عني لاكسرهالك انا شايف انه ايدك بقت بتتمد كتير
ادهم باستغراب :في ايه مالك مش طايقة نفسك ليه
نور بغضب :لاني ما بحبش الخنقة ما بحبش التحكمات اجبرتني اغير هدومي وقلت ماشي
داني كلمني واديته مشغول ليه هااه ليه
ادهم ببرود :اهاا قوليلي بقى انتي كل ده مدايقة على حبيب القلب
نور بصتله بغضب :انت بتقول ايه
ادهم :ايه مش برضوا كنتوا في يوم بتحبوا بعض وهتتجوزوا ولا ايه
نور بصتله بغضب :انا مش عايز اغلط فيك لكن انا دلوقت بندم على الفرصة الي ادتهالك لانك ما تستاهلهاش
وسابته ونامت
ادهم ندم على الي قاله وقرب منها وباسها على كتفها :انا اسف
نور :اقفل النور
ادهم لفها عليه :انا اسف بجد ما كانش قصدي
نور بصت في عينيه بعتب
ادهم وهو بيمسح على شعره :انتي عشقي يا نور انتي ادماني معاكي عرفت يعني ايه حياة اوعي تنخنقي من غيرتي لاني هفضل اغار عليكي من هدومك حتى اخر يوم في عمري
نور حاولت تهدأ:ما تخنقنيش يا ادهم
ادهم بهزار :هحاول لكن ما اوعدكيش
وقرب عليها وخد شفايفها بشغف عاشق
...........................................................
عند ندى وادم
ادم كان بيلعب على الموبايل
ندى :اااااع
ادم بخضة :في ايه يخرب بيتك
ندى بصرااااخ :نااار نااار ناار
ادم بص حواليه بقلق :فين النار انتي بتهزري
ندى قربت منه بدلع :في قلبي يا ادهم قلي والع نار
ادم بغيظ :اقسم بالله مجنونة وبنت مجانين
ندى:ومرات مجنون هههههه
ادم :مجنون هااه طيب وليس على المجنون حرج تعالي هنا وخدها وزقها السرير وهي بتضحك بصوت عالي
سلمى بغيظ :سامعة يا ماما صوتهم لا خجل ولا حيا
كارما :سامعة يا بنت بطني مهو لو كنتي فالحة كنتي هتبقي مكانهم دلوقت لكن اقول ايه فقرية من يومك معرفتيش تلفي على حد فيهم
سلمى اتجننت وراحت اوضتها وكارما بتتوعدلهم
بعدد مدة كارما شافت سامي داخل وبيبص حوالية ومعاه تكياس كتير وطالع اوضته
كارما بصدمة :سامي بيه رايح السوق على شان مروى هانم لااا دي عايزة طرد بدري بدري من القصر دي خطر علينا
دخل سامي على مروى
كانت نايمة وشعرها مفرود جنبها
سامي بصلها بعشق ولهفة وقرب منها :اااه لو تعرفي قربك ده بيعمل فيا ايه انا مش مصدق انك بقيتي ليا حتى لو اخر ايام حياتي نفسك في اوضتي كفايا عليا
سامي باسها على دماغها وبص للكنبة كانت مروى حاطاله شرشف ومخدة
سامي بسخرية من نفسه :سامي العمري ينام على الكنبة وبص لمروى بغضب من نفسه هتعملي فيا ايه تاني يا مروى
......................................
في الصباح
كان الكل مجموع على السفرة وسامي مترأسها كالعادة
نور بخجل لادهم :اسأل جدو عن خالتوا يا ادهم
فريدة بغيظ :امال فين مروى يا عمي
سامي :اسمها مروى هانم او تندهيلها حماتي فاهمة
كارما بغضب :يعني ايه هتتحكموا في اختي تقول ايه ومتقولش ايه
هنا نزلت مروى بكل شموخ لابسة عباية باللون الفيروزي مناسبة لسنها وشال مرمي على شعرها الحريري
مروى نزلت ببرود : انا بقول انك يا كارما طولتي اووي في زيارتك دي ولازم ترجعي بيتك بقى
لقراءة الفصل التالي اضغط هنا 👉
