رواية موضوع عائلي الفصل الاول 1 بقلم رحاب القاضي
#موضوع_عائلي
_الحلقه الاولي
"المأذون_والعروسه"
ـــــــــــــــــــــــــــــ
_ في منطقه شعبيه وبيت بسيط، طلعت هناء من المطبخ وفتحت الباب اللي كان بيخبط وكان راجل كبير ومعاه رجالته اللي ماسكين شنط وعلب كتيره..
هناء بضيق
اصطبحنا واصطبح الملك لله نعم يا حامد؟..
دخل حامد وقال
حط ياد الحاجه دي وانزلو استنوني تحت يلا..
هناء بضيق
اللهم طولك يا روح، ما مانش ليه لزوم يا معلم حامد..
حامد بصلها بجمود وقال
انا مش جاي ولا جايب ليكي يا هناء انا جاي لولادي...
_قال كلامه وسابها متعصبه وراح قعد علي الكنبه بعد ما طلعو رجالته وقال..
حامد
واقفه عندك. روحي صحيهم قوليلهم ابوكم عايزكم واعمليلي شاي..
هناء بحده
بقولك ايه يا حامد جو المعلمين بتاعك ده تعمله علي اي حد غير هناء وما عندناش شاي بس...
طلع مازن من اوضته وقال
في ايه يا ماما هو انتي لماما تلاقيش حد تتخانقي معاه، بتتخانقي مع نفسك..
هناء بغيظ
اتلم يا واد بتخانق مع ابوك اهو قاعد..
بص مازن لحامد. وقال بضيق
نعم في حاجه؟..
هناء بحده
اتلم يا واد انت وكلم ابوك كويس، واقعد معاه لحد ما اروح اصحي اخوك..
_ قالت كلامها ودخلت اوضة محمد ابنها الكبير اللي كان بيقرأ قرأن وابتسمت وقالت..
هناء
وكأني شايفه ابويا الله يرحمه قدامي بقيت صوره منه يا حبيبي..
قفل محمد المصحف وقال
صباح الفل يا ست الكل، ليه معصبه نفسك علي الصبح كده؟...
هناء بضيق
اللي ما يتسمي بره اطلعله واسمع خليه ياخد الحاجات اللي جايبها معاه..
محمد بهدوء
انا اسف يا ماما مش هقدر اقوله خدهم واكسفه عديها عشان خاطري..
هناء بغيظ
طيب خليه يمشي بسرعه انا بشوفه بيركبني ميت عفريت..
محمد
حاضر يا ست الكل بعد اذنك..
_ وطلع بره وسلم علي باباه وقعد معاه هو ومازن وحامد زعق فيهم وقال..
حامد
يعني ما فيش فيكم فايده، ما فيش واحد منكم قادر يجي يقف مع اخوه ويسنده وتبقو عزوه يا ولاد حامد..
محمد بجديه
لا هنقف جنبه ونساعده لما يكون بني ادم كويس مش بلطجي..
وقف حامد وقال
ماشي يا شيخ محمد واخوك يونس مش بلطجي، اخوك بيجيب الحق للناس والحته كلها واللي حواليها عايشه في حماه وشايل اسمي مانك يا كبير...
طلعت هناء وقالت
شرفت يا معلم حامد ما تكررهاش تاني بقي..
محمد بضيق
تنور وتشرف في اي وقت يا بابا، لو سمحتي يا ماما خلاص..
وقف حامد قدام هناء وقال
كله منك خدتيهم مني وطلعتيهم بركه زي ابوكي الشيخ راضي..
هناء بسخريه
مش كفايه اللي عملته في يونس ابنك جاي تخرب عيالي روح الله يسهلك لحالك...
_طلع حامد وهو مدايق بس وقف عند الباب وقال لمحمد بحده..
حامد
هي كلمه لو ما رجعتش من نفسك يا شيخ محمد انا هرجعك بطريقتي...
_ وطلع ورزع الباب ورااه، ومحمد اتنهد بضيق وقربت. منه هناء وقالت..
هناء
عندك كتب كتاب مش كده؟..
محمد ابتسم وقال
ايوه يا ماما وهتعبك تكويلي البدله، ده فرح بنت واحد. من تلامذة جدي الله يرحمه..
هناء
طيب يا حبيبي كبرت وبقيت مأذون قد الدنيا مش ناويه تفرحني وتتجوز..
محمد
لسه النصيب ما جاش يا امي..
زعقت فيه هناء وقالت
هو النصبب ده هيجيلك لحد عندك.، ما تسمع الكلام وتشوف عروسه من اللي جايباهم ليك..
محمد
مش عايزك تكوي البدله يا ماما انا هكويها، بعد اذنك انا نازل اشوف المحل تحت...
_مشي محمد وهي كانت مدايق ووقف جنبيها مازن وقال..
مازن
كا تزعليش نفسك يا ماما حقك عليا بصي جوزيني انا، انا عايز اتجوز..
هناء بحده
يا اخويا اتخرج الاول من الكليه يا ساقط الثانويه انت وبعدين فكر في الجواز بلا نيله..
مازن بغيظ
ماشي ما انا مش الشيخ محمد عشان تجوزيني، المهم العلم عايز فلوس ايدك بقي علي 200 جينيه..
هناء
كان علي عيني منين بس احنا اخر الشهر ومش معايا..
مازن بغيظ
طلعي يا ماما الفلوس اللي شيلاهم تحت مرتبة السرير وهيبقي معاكي فلوس.
هناء
بس يا واد دول شيلاهم لوقت ذنقه، وبعدين علي رأي المثل يعمل ايه المال والبال مش رايق..
مازن
لا هاتي انتي بس المال والبال هيروق وهيبقي زي الفل، هاتي الفلوس يا ماما بقي...
هناء
اتلم يا واد وبطل زن واوعي كده اروح اغير مكان الفلوس ولو جيت ورايا هنفخك...
ودخلت جوه وهو قال بغيظ
ماشي يا هناء والله لاسرقهم منك واحرق قلبك عليهم...
ــــــــ #بقلم_الكاتبه_رحاب_القاضي ــــــــ
_ وفي مكان تاني كانت في بنت جميله واقفه في بلكونة بيتهم وهي بتتفرح علي الخناقه اللي في الشارع وخايفه جدا، وجات مامتها وقفت جنبيها وقالت..
فايزه
كفايه بقي ادخلي والله لو شافك يا نور يومك مش هيعدي علي خير..
نور بقلق
اسكتي بس يا ماما لحد ما نشوف اخرتها مع سي يونس...
ـ وتحت في الشارع كان واقف يونس، شاب في عمره الـ30 شكله عادي بس نظراته قويه ومرعبه للولد اللي واقع علي الارض ووشه كله كدمات ود*م وقال..
يونس بصوت عالي
ما تقوم يا دكر وترويني نفسك قوم يااه...
قرب منه راجل كبير وقال
حقك عليا انا يا معلم يونس، انا هربي ابني ومش هيزعلك تاني...
يونس بحده
ابنك يا حج جاب شوية صيع وعايز يعمل كبير ويقف في وشي وانا ما رضيتش ازعله عشانك انما والله لو اتكررت تاني او رفع عينه فيا هخليك توصله المقابر امين يا حج...
الراجل بدموع
حاضر يا ابني اللي تشوفه..
_ سابه يونس وميل علي الارض يجيب التيشرت بتاعه بس جه واحد. من الرجاله بتوعه واداه ليه وقال باحترام..
صبحي
عنك انت يا معلم يونس اتفضل...
_ اخده منه يونس ورفع عينه علي بيت نور ولما شافها واقفه بصلها بعصبيه وهي دخلت بسرعه وهي مدايقه..
فايزه
عجبك كده اهو شافك استحملي بقي اللي يحصل..
نور بضيق
انا تعبت يا ماما منه بقي بقي انا اتجوز البلطجي ده..
فايزه
الله يرحم مش ده اللي روحك فيه وبتحبيه من صغرك ايه اللي اتغير...
وقفت نور قدام المرايه وقالت بغرور
ده كان زمان انما انا دلوقتي نور المتعلمه اللي يوم ما هتتخرج من كلية الطب هتكون دكتوره اد الدنيا، وفي الاخر اتجوز يونس البلطجي...
فايزه بسخريه
بلاش تبصي لفوق يا بنتي عشان رقبتك ما تتلوحش، وخليكي فاكره ان الكليه ونور نفسها اتعملت من خير يونس، انا داخله اكمل تجهيز الغدا، ولو كلمك راضيه بكلمتين ده لو مش عايزاه يجي ويكسر رقبتك...
_ دخلت فايزه المطبخ ونور قعدت مدايقه وقالت لنفسها بغيظ..
نور
هو انا ضربته علي ايده عشان يصرف عليا مثلا...
_ وموبيلها رن وكان يونس، اتنفضت ايدها بخوف وردت وقالت..
نور
والله العظيم امي هي اللي قالتلي اقف اتفرج..
يونس بحده
هي كلمه يا بت انتي لو لمحتك واقفه في البلكونه دي تاني ه..
نور بخبث
واهون عليك يا يونس، وبعدين انا كنت خايفه عليك..
يونس ابتسم وقال
ليه ان شاء الله عيل صغير ولا ايه، وبعدين ما تخافيش هو انا حد يقدر عليا اصلا..
نور بضيق
ولازمتها ايه بس الخناقات دي ما كنت كلمت الشرطه وو...
يونس بحده
لييه مشلول مش هقدر ادافع عن نفسي ده انا اقوم ببلد يا بت...
نور
ما تقوليش بت انا اسمي نور، واقفل عشان رايحه اذاكر..
يونس بهدوء
بحبك طيب..
نور بضيق
امي بتنده عليا سلام يا يونس..
_ قفلت معاه وهو قعد علي القهوه اللي تحت بيتهم وبص للبلكونه بتاعتها وابتسم، وجه يوسف صاحبه وقعد جنبيه وقال..
يوسف
راضيه عنك مش كده؟..
يونس بحده
انت ياد انت عامل زي الشرطه في الافلام بتيجي في الاخر تاخد اللقطه..
يوسف ضحك وقال
ههههه علي اساس انك محتاجني معاك يعني، المهم ابوك عايزك تكتب علي نور..
يونس بجمود
هو قالك كده؟..
يوسف
اكيد طبعا اومال هاجي اتكلم معاك في موضوع زي ده من نفسي وانا عارف اللي فيها..
يونس بضيق
دماغها بقيت صرمه قديمه من لما دخلت كلية الطب، بقيت بتستخسر فيا الكلمه حتي..
يوسف
قولتلك بلاش قولتلي لا مش هحرمها تتعلم، اتحمل بقي..
بص يونس علي بيتها وقال
براحتها بس طلعت ولا نزلت مش هتتجوز غيري بالذوق او بالعافيه..
ــــــــ #بقلم_الكاتبه_رحاب_القاضي ــــــــ
_ وفي منطقه تاني جنبيهم، في بيت الاستاذ حمدي كان البيت كله متزين ودخلت فاطمه اوضة بنتها هاجر العروسه وقالت..
فاطمه
وبعدين ما ردش عليكي.. مش المفروض عريس الغفله ده يبعت البنت اللي هتعملك الميكآب ؟..
هاجر بضيق
خلاص يا ماما انا هبعت اجيبها تلاقيه لسه نايم..
فاطمه
طيب انجزي ده الضهر اذن من شويه بدل ما تتاخري..
هاجر
حاضر يا ماما، ابعتيلي بس ولاء اختي عشان تساعدني لحد ما تيجي البنت بتاعت الميكآب..
_ واليوم عدي وبالليل كان الكل قاعد والمأذون اللي كان محمد وكلهم مستنين العريس اللي مجااش..
حمدي لفاطمه
شايفه اختار بنتك انا ياما لساني نشف معاها وقولت عادل لا ده عيل مش راجل يفتح بيت..
فاطمه بقلق
يا اخويا مش وقته الكلام ده، المهم دلوقتي هنعمل ايه بنتك قاعده جوه وابن اخوك ما جاش والناس خلاص كلت وشنا..
قرب منهم محمد وقال
يا استاذ حمدي انا بقالي تلات سعات قاعد، في كتب كتاب النهارده ولا اتكل علي الله..
حمدي بحزن
والله يا ابني ما عارف اقولك ايه، بس العريس ما جااش ومش بيرد علي حد وانا مش عارف اتصرف وبنتي سمعتها هي واختها هتبوظ..
محمد
ازاي بس الكلام ده هو مش العريس ده يبقي ابن اخوك علي حسب ما وصلني ، ازاي يعمل كده؟..
فاطمه ببكاء
نصيبنا بقي هنعمل ايه، هو حظي وحظ بناتي ديما قليل..
حمدي
خلاص يا محمد يا ابني تقدر تمشي معلش عطلتك..
محمد بجديه
بقولك ايه يا استاذ حمدي انا مستعد اتجوز بنتك دي،ومش هخلي حد يمس سمعتك انت وبناتك باي كلمه..
حمدي بصدمه
ايه انت عايز تتجوز بنتي انا،طيب انت عمرك ما شوفتها اصلا وو..
محمد بجديه
يا استاذ حمدي انا اسمع عنك ديما من جدي الله يرحمه ومن امي والناس وشرف ليا اتجوز بنتك والله، ومش مهم اشوفها المهم الاخلاق عندي وانا واثق في تربيتك واعتبرنب اني بتقدم رسمي واكتب الكتاب علي طول...
فاطمه بقلق
جرا ايه يا حمدي انت هتجوز بنتك لواحد ما تعرفوش؟..
حمدي ابتسم لمحمد وقال
لا اعرفه واعرفه كويس علي الاقل احسن من اللي اختارته بنتك وسابها وهرب،وده هيستر علينا من الجرسه اللي ممكن تحصل..
_وفعلا كلم محمد مأذون زميله وجه وكتب الكتاب علي هاجر اللي مكانتش تعرف حاجه لحد ما دخل عندها باباها ومامتها ومعاهم الدفتر عشان تمضي..
هاجر بفرحه
هو ايه صوت الزغاريت اللي بره ده هو عادل جه صح؟..
حمدي بغيظ
لا ما جاش ولا هيجي ابن اخويا وعارفه واطي هو.وامه امسكي امضي..
هاجر بعدم فهم
ماما هي الصدمه لحست دماغ جوزك ولا ايه، امضي علي ايه والعريس ما جاش اصلا..
ولاء بسخريه
لا ما هو بابا جوزك المأذون لما اتزنق في عريس، اهو عريس وخلاص علي ما تفرج..
هاجر بعصبيه
نعممممم انتو بتهزرو صح، مأذون ايه اللي اتجوزو..
حمدي
ما اسمعش صوتك وانتي تحمدي ربنا اننا لقينا حد يشيل الليله دي، وامسكي امضي والا مش هخلي ليلتك دي تعدي علي خير..
فاطمه
اكسري الشر يا بنتي وامضي الواد شكله محترم والله..
هاجر بغيظ
شكله محترم انتو بترموني لاي حد وخلاص عشان خايفين علي سمعتكم..
حمدي
اخلصي يا بت انتي وامضي يلا وهتروحي بيت جوزك دلوقتي كمان انا زهقت منك ومن عمايلك..
_ومضت هاجر علي عقد الجواز وهي خايفه من باباها ودموعها ماليه عينيها، وبعد شويه مشيت الناس وطلعت عشان تروح مع محمد بيته، بس هو اول ما شافها اتصدم وقال..
محمد
لا مستحيييل انتي العروسه اللي انا اتجوزتها؟!..
هاجر بصدمه
يخربيتك هو انت، انتو مالقتوش غير اللي متربي عشر مرات ده عشان تجوزهولي..
حمدي
استنو انتو الاتنين انتو تعرفو بعض منين؟.
محمد
انا هحكيلك يا عمي..
_فلااااااااااش باااااك..
في يوم كان محمد عنده برد وراح المستشفي ياخد حقنه، ودخل اوضة الممرضين اللي كانت فيها هاجر لوحدها..
محمد
لو سمحتي يا مدام انا كنت عايز اخد اا..
هاجر بحده
ايه مدام دي يا كابتن انسه يا عديم النظر لو سمحت..
محمد ادايق من اسلوبها وقال
طيب يا انسه لو سمحتي انا عايز اخد الحقنه..
هاجر بجديه
طيب اقفل الباب وتعالي ورايا..
محمد بتوتر
ايه يا انسه اللي انتي بتقوليه ده ما يصحش كده؟..
هاجر بغيظ
يا عم هو انا بقولك تعالي اما اخلي بيك، ده انا هديك الحقنه ولا انت عايز تاخدها والباب مفتوح وامة لا اله الا الله تتفرج عليك..
محمد بضيق
لا انا عايز راجل هو اللي يديني الحقنه لو سمحتي..
هاجر بحده
ومدام انت عايز راجل هو اللي يديهالك ايه اللي جابك في وشي طيب هو انا ناقصه وشوش علي الصبح؟..
محمد بغيظ
هما قالولي ما فيش ممرضين الا هنا، وانا كنت فاكر انك راجل..
هاجر بسخريه
وطلع ما فيش غيري اهو، هتاخد الحقنه بقي ولا هتمشي وتوريني عرض كتافك..
محمد بتوتر
طيب هو انا ينفع يعني اخد الحقنه في دراعي؟....
هاجر بغيظ
اللهم طولك يا رووووح..
محمد بقلق
خلاص بس بلاش تقفلي الباب علي الاخر سيبي حته مفتوحه..
هاجر بضيق
انجز ووريني الحقنه اللي في ايدك دي..
_ واخدت هاجر منه الحقنه و وقفلت جزء من الباب وبعد ما اخد الحقنه كان محمد مكسوف جدا ووشه احمر، ضحكت هاجر غصب عنها وقالت..
هاجر
هي الدنيا جرا فيها ايه بس اخييي علي الرجاله..
محمد بغيظ
في حاجه اسمها حياء خجل وكسوف ولا حضرتك ما سمعتيش عنهم..
هاجر بحده
لا انا ممكن. اسمعك الاحلي من كده صوت ايدي وهي بتطرقع علي وشك لو ما مشيتش من قدامي، وابقي بعد كده يا عسل خلي الدكتور يكتبلك علي حقنه شرعيه ما بتحمرش الخدود..
_باااااااك..
بص حمدي بعصبيه لولاء اللي قالت بتوتر
انت بتبرقلي ليه دلوقتي علي فكره بقي هو اللي استفزني الاول..
حمدي
انا مش عارف اقولك ايه بس يا محمد يا ابني.
محمد
لا ولا يهمك يا عمي حصل خير، انا همشي بقي يلا يا عروسه..
ولاء
انتو مش هتيجو معانا ولا ايه؟..
الام
هنيجي معاكي فين، بكره الصبح هنجيلك نطمن عليكي، خلي بالك من نفسك يا حبيبتي..
مشيت ولاء مع محمد اللي كان ساكت مش بيتكلم واول ما وصل بيته ودخل لقي مامته في وشه..
محمد
قبل ما تتعصبي او تقولي اي حاجه انا هفهمك الموضوع بس اهدي..
هناء بصدمه
هو انا عشان بزن عليك واقولك تتجوز، تقوم تتجوز فعلا من ورايا، مييين دي؟..
هاجر
بقولك ايه يا عسل انا رجلي وجعتني والفستان كتم علي نفسي دخلي الشنطه دي في الاوضه اللي هنام فيها وبعدين فهم امك الموضوع علي مهلك..
هناء بحده
ما حدش هيتحرك من هنا غير لما افهم الموضوع مين دي، اتجوزتها امتي قولي كمان مخلف منها كام عيل من ورايا؟.
هاجى بحده
جرا ايه يا حجه ما تبلعي ريقك كده وتفهمي الموضوع، ابنك لسه متجوزني النهارده علي سنة الله ورسوله..
عيطت هناء وقالت
وما قولتليش ليه يا محمد مستعر من امك؟..
محمد بهدوء
يا ماما ابوس ايدك تعالي بس معايا نتكلم جوه وانا افهمك الموضوع بدل ما الجيران هتتفرج علينا..
ودخلت هاجر ومحمد وقالو اللي حصل لهناء اللي اتعصبت وقالت..
هناء
هو انت بقي كنت رايح تكتب كتابها يا حضرة المأذون ولا تستر عليها..
هاجر بغيظ
بقولك ايه سكت امك انا علي اخري..
محمد
يا ماما انتي مش كنتي عايزاني اتجوز، اهي جوازه كويسه جات قدامي وخلاص...
هاجر بضيق
اللهم طولك يا روح، اوضتي اللي هتنيل فيها فين؟..
هناء
وبعدين انا اعرف الاستاذ حمدي صاحب المرحوم جدك ومن تلامذته اكيد ام اربعه واربعين دي مش بنته..
هاجر بعصبيه
لا بقي انتي زودتيها، بقولك ايه لتكوني فاكراني لقمه طريه وهتعملي عليا شغل الحمواات لااا ده عضمي مر..
محمد بقلق
اسمها لحمي مر...
هاجر
مالكش دعوه وامك لو اتكلمت تاني انت ما تعرفش انا هعمل فيها ايه؟..
هناء بغيظ
الله واكبر عليك يا ابني يوم ما تتجوز روحت اتجوزتلي وحده شلق..
هاجر بحده
بقي انا شلق، طيب وسع كده يا حيلة امك انت هوريها الشلق كويس،لا فووقي ده انا ممرضه محترمه وقد الدنيا ..
هناء بخبث
ومش بس شلق وكمان سرنجه يا محمد جايبلي في ايدك سرنجه وتقولي اتجوزت..
هاجر
اوعي كده يا شيح محمد سيبني عليها..
محمد
انتي هتعملي ايه دي امي يا مجنونه وبعدين ست كبيره هتتخانقي معاها..
هاجر بحده
ما هو علي رأي المثل اللي قال الكبير لو احترم سنه الصغير مش هيقل منه..
محمد بغيظ
هو انا متجوز ممرضه ولا سواقة توكتوك..ممكن تسكتي وتدخلي جوه اوضتي اهي اول ..
وفجاه طلع من اوضته اخوه مازن اللي في كليه تمريض وقال..
مازن
ايه ده يا محمد انت اتجوزت الف مبروك، هات بقي موبيلك اشوف الماتش عليه عشان موبيلي فصل..
محمد
غوري يلا من وشي انا ناقص تفاهه وبعدين شوفلك كلمه ذاكرها بدل الكوره اللي لحست دماغك دي..
خلص محمد كلامه ودخل اوضته هو وهاجر، ومازن قرب من مامته وقال..
مازن
ماما ما تجيبي انتي موبيلك اسمع عليه الماتش..
هناء بحده
يا برودك انت كمان بقي اخوك نتجوز من ورانا وانت كل اللي هامك الماتش ده ايه الخلفه اللي تجيب الهم دي بس يا ربي..
ودخلت هي كمان اوضتها ومازن قال بغيظ
يلاا يا عيله نكديه، اشوف الماتش ازاي بقي دلوقتي..
_ وجوه اوضة محمد وهاجر كانت واقفه متخشبه ودموعها ماليه عينيها، وقرب منها محمد وقال..
محمد بتوتر
بصي يا انسه هاجر انا اا..
بصتله هاجر بحده وقالت
انسه ايه بقي في واحد. يقول لمراته انسه بص يااه جو الاحتىام مش هياكل معايا تكتم بقوك ده بقي لحد الصبح يكون بابا هدي شويه ونفضها سيره..
قرب منها محمد وقال بخبث؟؟؟
_ تفتكرو بقي هيحصل ايه؟...
ـــــــــــــــــــــــــــــــــــــــــــ
#بقلم_الكاتبه_رحاب_القاضي
لقراءة الفصل التالي اضغط هنا 👉
لفصول الرواية مجمعه اضغط هنا 👉
![](https://www3.0zz0.com/2024/05/26/06/919983638.jpg)
![](https://www3.0zz0.com/2024/05/24/17/749409247.jpg)
![](https://www12.0zz0.com/2024/05/23/19/529447582.jpg)