روايه غلطه مين الفصل 4 الرابع بقلم نشوه عادل
-متقولش ابنك بس هو ابنك انت ولا نسيت يا ..يا سليم بيه
سليم: دلوقتى بقا ابنك انت بس ومش ابنى مش ده اللى يوم ما دخلتلك بيه وهو لسه طفل ابن ست شهور كنتى طايرة بيه من الفرحة وما صدقتى انك هتبقى ام بعد ما كنتى عقيم
فرح: قصدك لما كنت مغفلة وضحكت عليا وفهمتنى انى عقيم ومبخلفش وزورت التحاليل وبقالك ١٩ سنة مستغفلنى مش كده!
سليم بتوتر: انتى.. انتى مين اللى قالك الكلام الفارغ ده؟
فرح بضحك: يا اخى اكتر حاجة بتعجبنى فيك حقيقى انك تبقى عامل العملة ومتقدرش تدارى قلقك وتوترك انت كل حاجة فيك وس..خة الا دى بالامانة يعنى
سليم : لسانك طول اوى يا فرح وصبرى عليكى خلص خلاص
فرح: ايه هتعمل ايه؟ هتق..تلنى زى ما عملت فى ابويا واخواتى عشان الورث يبقى كله ليا وتقدر تكوش عليه ولا هتودينى مستشفى المجانين زى مراتك الاولى اللى هى ام سيف اللى فهمتها انه مات ولا هتحبسنى زى ما عملت مع شريكنا ف الشركة واتهمته انه بيتاجر بالممنوعات!
سليم: انتى ايه الهلفطة اللى بتهلفطى بيها دى انتى عارفة لو مكنتش خايف ع سيف كنت خلصت عليكى حالا
فرح بتهكم: لا كتر خيرك انت وابنك والله انا بقيت بكرهه عارف ليه لانه بقا نسخة بالكربون منك ورث عنك كل حاجة الخيانة والبجاحة وقلة الادب وقلة الاصل
وقتها لم يتمالك سليم نفسه ومسكها من رقبتها جامد وقال: قولتلك ان سيف اللى مصبرنى عليكى لحد دلوقتى يا فرح وانتى مصممة تزيدى من اخطاءك بس خلى بالك زى ما عملت كل اللى انتى قولتى عليه ده اقدر اعمل الاكتر منه واقدر كمان اقت..ل بايدى
فرح باختناق وصوت متقطع: سي..بنى يا سل..يم هم.وت
رماها سليم ع الارض بقسوة فصرخت من الوجع وسمع سيف صوتها من اوضته نزل جرى وبلهفة وخوف : ماما فى ايه مالك ؟! فى ايه يا بابا ؟!
سليم بغضب: اطلع ع اوضتك حالا ومتنزلش منها تانى دلوقتى سامع
سيف : مش هطلع غير لما اخد ماما معايا انا مضمنش ممكن تعمل فيها ايه !
سليم بصراخ: سيييييييف اطلع ع اوضتك حالا
ساعد سيف فرح انها تقوم واخدها معاه طلعها ع اوضتها ونيمها ع السرير: متقلقيش يا ماما انا معاكى متخافيش
فرح: اطلع برة يا سيف عاوزة ابقى لوحدى
سيف: ايوة بس مش هينفع اسيبك فى الحالة دى وكمان عاوز افهم ايه اللى حصل؟
فرح بتنهيدة: ابقى اسال ابوك ولو عنده الجراة يبقى يقولك هو ممكن تسيبنى بقا من فضلك
سيف: حاضر عن اذنك تصبحى ع خير
طلع سيف وسابها واما تأكدت انه مشى جريت ع الباب قفلته بالمفتاح وخرجت من شنطتها فون تانى فتحت الواتس وبعتت فويس منه ع رقم ايهاب وسابتله ماسدج: الفويس ده فيه روحى احتفظ بيه فى الوقت المناسب لازم نخرجه
ايهاب: اطمنى بس فهمينى هو عمل فيكى ايه؟!
فرح: كان هيمو..تنى بس متقلقش انا بخير دلوقتى لكن يا عالم ممكن يعمل فيا ايه
ايهاب: قولتلك متخافيش انا فى ضهرك لحد ما نرجع حقنا
فرح: خلى بالك من نفسك اللى زي سليم ده ملوش امان وممكن يإذيك او ياخدك كبش فدى
ايهاب: متقلقيش انا فايقله اوى يلا تصبحى ع خير
فرح: وانت من اهله يا حبيبى
عند سليم كان قاعد مش طايق نفسه جاله فون من رقم مش متسجل بس هو عارفه
سليم رد بغضب: عاوز ايه يا زفت انت انا مش قولتلك متتصلش بيا تانى
.......: اهدى يا سليم بيه انا عاوز بقيت حقى مش اكتر
سليم: حقك ايه انت هتستهبل ما انت لاهف ربع مليون جنيه يوم العملية
الدكتور بضحك: ده كان حق مو.ت البيبى لكن حق مو.ت ام البيبى لسه مأخدتوش
سليم: اسمع ياض انت الظاهر انك مش عارف انا مين الاحسن تسأل عنى وتراجع نفسك كويس لانك هتروح فى ستين داهية
قفل سليم السكة بوشه ولم ينتظر منه رد وبعدها اخد عربيته وخرج وساب الفيلا
تانى يوم فاق سيف ع صوت خبط قوى ع باب اوضته قام بغضب: هو فى ايه حد يصحى حد كده
سليم: الساعة ٨ يا سيف باشا صحى النوم عندنا شغل
سيف بتأفف: انت برضه مصمم انك تاخدنى معاك الشركة
سليم: ايوة وهتتعلم كل حاجة عشان بعد عمر طويل كل ده هيكون ليك فلازم تكون راجل واد المسؤلية
سيف: حاضر يا بابا هلبس واحصل حضرتك
سليم وهو بيبص ف ساعته : معاك ربع ساعة هستناك تحت فى العربية
بعد ربع ساعة نزل سيف وركب جنب سليم العربية وهو مضايق جدا وصلوا الشركة
ايهاب بمزح: ايه ده سيف باشا بنفسه هنا؟
سليم: لا اتعود لانك هتشوفه كل يوم بعد كده
ايهاب بعدم فهم: مش فاهم يعنى ايه؟
سيف بغضب مكبوت: اصل بابا قرر يشغلنى هنا بالشركة
سليم: بابا! بابا دى هناك فى البيت انما هنا انا مستر سليم او سليم بيه مفهوم
سيف: مفهوم طبعا يا سليم بيه
سليم: اسمع يا ايهاب من النهاردة شغلتك الشاغل الواد ده تعرفه كل كبيرة وصغيرة عن الشغل
ايهاب: تمام حاضر
يعدى سنة كاملة كان سيف خلص ثانوى عام ودخل اكاديمية ادارة اعمال وفهم كل حاجة عن شغل الشركة وفى يوم كان سيف فى البيت بيتغدى مع فرح
فرح: سيف انت هتعمل ايه بعد الغدا؟!
سيف: ولا حاجة يا ماما عندى كورس اونلاين وبعدها هطلع ع الشركة
فرح: طب انا عاوزاك تيجى معايا مشوار مهم ممكن
سيف: طبعا يا حبيبتى خلاص بعد الكورس هاجى معاكى بس ع فين؟
فرح : واحدة صاحبتى تعبانة وعاوزة ازورها
سيف: طب وانا مالى اجى معاكى ليه ومن امتى اصلا وانتى بتاخدينى معاكى!
فرح: توصلنى وبعدين زيارة المريض صدقة
سيف: تمام حاضر
خلص سيف الكورس وركب عربيته وراح مع مامته المستشفى لكنه اتصدم لما عرف انها مصحة نفسية اتكلم باستغراب: ايه ده يا ماما دى.. دى مستشفى المجانين!
فرح: اولا اسمها مصحة نفسية ثانيا صاحبتى هنا وملهاش حد يجى يزورها وواثقة انها هتفرح لما تشوفك
سيف: لما تشوفنى انا؟! انا مش فاهم حاجة !
فرح: اهدى وانت هتعرف كل حاجة دلوقتى
دخلت فرح مع سيف ع غرفة فيها سيدة من عمر فرح لكنها تبان عجوز من كثرة حزنها كانت فاقدة النطق وماسكة لعبة صغيرة حضناها وبتنزل دموع بصمت
فرح : ازيك يا وداد فاكرانى انا فرح المنسى
اول ما شافتها وداد انكمشت ع نفسها بخوف .. فرح: اهدى واسمعينى ابنك مامتش زى ما سليم فهمك ابنك عايش
وداد بصتلها باستغراب فاكملت فرح: سيف تعال يا حبيبى
دخل سيف وبص لوداد بحزن واول ما وداد شافت سيف حست بنغزة بقلبها فشعور الام لا يمكن ان يخطئ فقالت فرح: قرب يا سيف سلم ع امك
سيف بصدمة: ايه ؟ امى ؟! انتى بتقولى ايه يا ماما؟!وووو..........................
استوب يا سكاكر بارت ورا بارت المفاجأت بتكتر والاحداث بتزيد غموض رأيكم يهمنى 🤍✨
#غلطة_مين الرابع
#بقلم_نشوه_عادل
لقراءة الفصل التالي اضغط هنا 👉
![](https://www3.0zz0.com/2024/05/26/06/919983638.jpg)
![](https://www3.0zz0.com/2024/05/24/17/749409247.jpg)
![](https://www12.0zz0.com/2024/05/23/19/529447582.jpg)