روايه الكافر الفصل الرابع
بقلم رحاب القاضي
هذه الرواية متوفرة فقط علي
لمتابعة الرواية اضغط هنا 👇
( روايه الكافر 👻 )
#الكافر
_الفصل الرابع
ــــــــــــــــــــــــــــــــــــــــ
_اتنفض جسمي بخوف بس ما رضيتش ابين اي حاجه عشان امي كانت واقفه جنبي ومش عايز اقلقها، وقولتله يحاول يرميها في اي مكان بره البيت ويكبر دماغه وينام
وبعد ما قفلت معاه امي حاولت تعرف مني ايه المشكله اللي مع زياد، وبصعوبه هربت من اسألتها ودخلت نمت، وتاني يوم الصبح روحت لزياااد البيت بعد ما كلمته وقالي وهو خايف ومرعوب
_اتفضل يا سيدي العمله اهي حتي بعد ما رميتها بره البيت صحيت لقيتها قدامي علي المخده، اتصرف انا خايف تجرالي حاجه امي واخواتي البنات مالهمش غيري
قولتله اننا ما قريناش النهايه بتاعت الكتاب ده، واتفقت معاه اننا لازم نلاقي حل ونخلص من العمله اللي ظهرت في حياتي وحياة صحابي وبتدمرنا دي في اسرع وقت ومش لازم اعرف حد بيها لاني كده بكون بقدمه للموت
وقررنا اننا لازم نروح نرجع الكتاب اللي وديناه المكتبه ونقرا اخره يمكن نلاقي وقتها حل نخلص بيه من اللي بيحصل ده
وروحنا فعلا المكتبه وسألنا علي الكتاب وكان لسه موجود، ولما فتحنا اخر صفحه فيه لقينا برضو مكتوبه كلمة كااافر، بس المره دي مكتوب تحتها انه لما انتحر كان خايف بس في ناس تانيه بتقول انه انتحر وقدم نفسه قربان للجن وان العمله دي ما حبستش الجن اصلا دي خلتهم يطلعو وياخدو هما القربان بنفسهم من خلال اي حد بتكون معاه العمله دي، بصلي زياد وقال
_طيب احنا نصدق ايه دلوقتي ان الجن بره ولا ان الجن محبوس
=لا الجن مش محبوس في البلد دي، الجن طلع براها وهو اللي بياخد القربان بنفسه
وبصيت في اخر الكتاب لقيت ان مكتوب عشان تخلص من العمله لازم ترميها في البير الاحمر في الصحراء اللي جنب البلد، وقتها انا وزيااد ما كناش نعرف البلد دي اصلا فين وفضلنا ندور في كتب الجن والحاجات دي علي امل اننا نلاقي اي دليل يقولنا فين البلد دي بس مالقينااش، لحد ما الليل جه وكنا مروحين وهو قالي
_انت هتاخد معاك العمله دي، انا مش فاهم هي ازاي جات عندي
=المهم انك ما حصلكش حاجه وايوه انا هخليها معايا
ورجعت البيت ولقيت كالعاده امي وابويا بيتفرجو علي التلفزيون، روحت قعدت معاهم شويه وبعدين دخلت نمت ومسكت العمله في ايدي وبدأت اركز في الرموز وقولت لنفسي اني ممكن لو فكيت الرموز دي الاقي حل برضو، بس ازاي افكها..
وحطيتها علي الترابيزه ونمت، واليوم ده حلمت بحاجه غريبه اووي، شوفت كلاب كتير بتجري ورايا في الحلم وانا كنت مرعوب اوووي منهم، وفجأه ظهر في وسط الكلاب دي علي صاحبي وكمان ايهاب وكان شكلهم مخيف اووي وصوت نفسهم زي صوت الكلاب بالظبط
فضلت اجري منهم برضو كتير لحد. ما لقيت ايهاب في وشي وكانت ليه انيااب زي بتاعت مصاصين الدماء كده، وقالي كلمه واحده وهي "كافر"
وهجم عليا وانا صرخت بكل قوتي وانو بقوم من النوم، وكنت باخد نفسي بسرعه وجسمي كله بيتنفض وعرقاان جدا، وكأني كنت بجري فعلا
دخلت عندي امي وسالتني ليه كنت بصوت وقولتلها اني شوفت كابوس، وهي فضلت تقرأ قرآن وهي حاطه ايدها علي راسي، وبعدين طلبت مني اقوم اصلي الفجر وقومت فعلا وبعد الفجر نمت وكنت مرتاح جدا في النومه دي لان ما حصلتش ليا اي حاجه...
وتاني يوم قابلت زياد وقولتله اننا لازم نفك الرموز اللي علي العمله دي ولو عرفنا معناها ممكن اووي نخلص منها ومن اللي بيحصل في حياتنا ده كله
وهو قالي اننا ممكن نروح لدجال الناس دي بتكون عارفه كل حاجه عن الجن وبيكلموهم كمان وبيتعاملو معاهم زينا، الاول كنت متردد بس هو اقنعني وفعلا روحنا عند دجال بيقول انه معرفه..
_بس انت تعرفن منين برضو الدجال ده يا زياد؟
=اختي عدت سن التلاتين ونصيبها ما جاش وامي كانت بتيجي عنده وقالها ان معمول عمل لاختي وهو فكه واختي فعلا بعدها اتجوزت علي طول
طبعا ما اقتنعتش باي كلمه بيقولها لان الجواز في الاول والاخر نصيب، بس اما مش معايا حاجه اخسرها وقولت اجرب ان الراجل ده يساعدنا
ولما دخلنا عنده كان راجل كبير شويه في السن بس الغريب ان وشه كان منور وماسك سبحه كده وتحس انه في ملكوت تاني، وقال اول ما دخلنا..
_ادخل يا زياد ما تخافش وقول لصاحبك كمان
قولتله اني مش خايف وكنت فعلا مش خايف انو شوفت حاجات سواء في المنام او الواقع تخوف اكتر من الراجل ده، فتح عيونه وبصلي شويه وابتسم وقالي
_انت جيت وجيبتهم معاك، يا اهلا وسهلا بضيوفك يا حسن
ما فهمتش هو قصده ايه بس لقيته ابتسم وبدأ يسألنا ايه مشكلتنا ولما قولتله الحكايه، طلب متي يشوف العمله ولما طلعتها واديتها ليه فجأه شوفت في الشباك اللي ورا الدجال ده خيال حد عدي بسرعه..اتنفضت وقولتله ان في حد ظهر ورااه بس هو بصلي وابتسم وفضل مركز في العمله وبعدين بص لزياد وقالي
_انت متأكد ان ده صاحبك؟
=ايوه طبعا هو في ايه يا زياد
اتوتر زياد واخد منه العمله وطلب مني نمشي بسرعه، وانا سمعت كلامه بس قبل ما نطلت من عنده قالي بصوت عالي..
_الجن مش محبوس الجن موجود حواليك ومعاك في كل مكان، وعشان تخلص من العمله لازم تخلص منهم هما الاول
وزيااد طلب مني انه يمشي عشان لازم يقف في الشغل مع ابوه، وهو مشي وانا لقيتني تلقائياً ماشي وروحت المكتبه اللي حطيت فيها الكتااب واول ما دخلت لقيت صاحب المكتبه واقف مع راجل تقريباً عنده 40 سنه وشكله بسيط جدا ولما شافني صاحب المكتبه قال.
_اهو هو ده اللي حضرتك بتسأل عليه، يا استاذ حسن الاستاذ كان بيسال علي صاحب الكتاب اللي انت جيبته لينا هنا
وقرب مني الراجل اللي واقف وسلم علية وقالي انه يعرف حكاية بلد الجن دي وسمع عنها في كتب اسطوريه كتير اوووي، بس كلها كانت باللغه الانجليزيه، وقالي كمان انه بيدور علي العمله بتاعت الجن وخصوصا انه عرف انها بتتنقل من جيل لجيل علي مر العصور، وانا سألته وقولتله
_هو الجن موجود اصلا ولا محبوس هناك
=بصراحه دي معلومه مش اكيده بس اللي كتب الكتاب ده لمح ان الجن بره وان اي حد بتكون معاه العمله دي بيبقي هو القربان بتاع الجن
كلامه كان واقعي جدا بس الغريب انه ان العمله دي فضلت معايا اكتر من يوم وانا ما حصليش حاجه، ايوه بشوف مخاوف وبتحصل حاجات غريبه بس مش الحاجه اللي تخليني اموت نفسي
المهم طلعتله العمله وقولتله اني محتاج افسر الرموز اللي عليها واعرف معناها، ده الحل الاخير اللي كان عندي عشان اقدر اخلص منها، وهو سألني لو فكيتهم وبرضو ما وصلتش لحاجه
السؤال ده انا وقفت عنده شويه وفكرت في حياتي دراستي اللي وقفتها اهلي اللي بعدت عنهم وصحابي اللي ماتو، في لخبطه كتير حصلت في حياتي من وقت ما اخدت الكتاب ده
بس زي ما قولت ده اخر حل عندي، وهو قالي ان في واحد صديق ليه درس الحاجات دي كويس ودرس كمان اللغه اللي كان بيتكلم بيها الجن زمان، واتفقت معاه اني بكره اقابله هنا واداني رقمه ومشيت ورجعت البيت لقيت امي قاعده بتعيط وابويا بيلفلها ايدها بشاش طبي، جريت عليها وسالتهم ايه اللي حصل، وابويا قالي..
_كانت واقفه عند البوتجاز بتعمل الاكل وفجأه النار هبت فيها
كنت حاسس ان البيت فيه حاجه غريبه اللي بيحصل ده مش طبيعي اطلاقاً، بس حاولت اطمن امي ودخلت انام بس اتصدمت لما دخلت اوضتي اني لقيتها كلها مكركبه وهدومي كلها مرميه علي الارض، كنت هنده اهلي بس ما رضيتش اقلقهم اكتر..
دخلت وانا خايف شويه وبقيت الم الهدوم من علي الارض وكنت لسه هحطهم في الدولاب بس اتنفضت بخوف لما لقيت مكتوب علي الدولاب بالدم كلمة كاافر، مديت ايدي عشان امسحها واشوف ده دم بجد ولا ايه، بس لقيتني بطير في الهوا وضهري بيتخبط في الحيطه جامد وبعدها وقعت علي الارض
قعدت علي الارض وانا ماسك ضهري جامد ومش فاهم حاجه، وكنت خايف جدا من اللي بيحصل ده، وبرضو ما خلصتش هنا فجأه باب البلكونه اتفتح اوي والهوا بقي مالي الاوضه ودخل من البلكونه زياد صاحبي، حاولت اقف وانا بقوله
_شوفت اللي حصل يا زياد وانت جيت هنا ازاي اصلا؟
=مين قالك ان انا زياد، زياد مات من بعد ما كلمك وقالك ان العمله معاه كل اللي حصل بعد كده كان وهم انا عيشتك فيه
كلمة رعب كانت قليله اووي علي اللي كنت حاسس بيه وانا شايف حجمه بيزيد وايديه بقيت مليانه عروق زرقا وقالي بصوت دخين
_عيبك انك سمعت كلام علي وما عملتش زيه، لو كنت عملت زيه كنت ارتحت دلوقتي
=هو علي عمل ايه اصلا؟
_اخد العمله بس وما شافش اللي في الكتاب انت بقي فضولي اووي وقريت فيه وعرفت انت وصحابك اللي ما كانش ينفع تعرفوه
سالته هما ليه ماتو ما ايهاب عرف اللي انا كنت اعرفه، ورده كان غريب قالي انه كان بيستخدمني انا وسيله عشان يوصل لصحابي وقدر يعمل كده فيا وما بقاش غيري انا...
وكان بيقرب مني جداً وكل ما بيقرب بحس بسخونه كبيره في جسمي لحد ما امي دخلت الاوضه فجأه هو اختفي وامي كانت مفزوعه من شكل الاوضه وقربت مني وسألتني ان كنت كويس او لا
بس انا قولتلها اني كنت بدور علي كتاب ضايع مني وفجأه دوخت ووقعت علي الارض، وبتدين قومت وقولتلها اني لازم اروح لواحد صاحبي اجيب منه الكتاب ده...
ونزلت تحت حاولت اكلم الراجل اللي شوفته في المكتبه وبصعوبه رد عليا ولما قولتله اللي حصل قالي انه هيجيلي حالا وهيكلم صاحبه اللي بيعرف لغة الجن ونقابلو..
وده حصل فعلا وروحناله البيت وكان باين عليه انه مرتاح وغني جدا وكان باين عليه من بيته، ومسك العمله وكان معاه ورقه وقلم وفضل يكتب كلام كتير وفجأه وقف وقال..
_الجن مش محبوس بعضهم بره وبعصهم جوه
=طيب وايه حكاية القربان ده؟
_كل ما يوهمو واحد يموت نفسه بيطلع واحد منهم من الارض دي، طلع منهم كميه كبيره جدا
وقالي اللي رعبني اكتر ان الكافر مات فعلا بس اللي بيطلع وبيتجسد بشكله اول جني ظهر ليه، وده قوته كبيره جدا وقالي ان فعلا المره دي الدور عليا انا في الموت
ولما سألناه الحل ايه قال ان الرموز دي معناها ان الجن قوته هتنتهي لما العمله تدفن في قبر ضحيه من ضحياهم كده اللعنه هتنتهي
الموضوع بالكلام ساهل بس تفكر ازاي تطبقه صعب، هو ازاي يعني اروح افتح قبر حد ميت، الموضوع مخيف جدا بس برضو اللي بيحصلي مخيف اكتر
المهم بعد كلام كتير مع الراجل ده عرفت ان الكتاب اللي كان معايا عمره تقريبا فوق ال100 سنه واللي كتبه ضحيه من ضحياهم ومن وقتها حط العمله في الكتاب لانه ما عرفش يفك الرموز اللي عليها
واللعنه فضلت محبوسه في الكتاب لحد ما وقع في ايدي وقالي ان الجن اختارني انا ليه بقي ما اعرفش، وموت علي وايهاب وزياد كل ده حصل منهم هما، اوهموهم بحاجات ما اعرفش هي ايه بس النتيجه كانت موتهم
ومشينا من عند الراجل ده وقررنا اننا نروح قبر واحد من صحابي ونحط فيه العمله دي، في الوقت ده افتكرت ام علي اللي كانت بتظهرلي
ولما قولت عليها لصاحبي الجديد ده قالي ان دي ما كانتش ام علي دي كانت هما او حد منهم وبيحاولو يمنعوني اقرا الكتاب عشان ما اقدرش اتخلص منهم
ولما وصلنا القبر بتاع علي لانه كان الاقرب لينا ادينا الحارس بتاع المدفن فلوس وقولناله اننا لازم نفتح القبر بسرعه، والغريب انه وافق وافتكرنا اننا جايين ندفن عمل او سحر وان ناس كتير كل يوم بتيجي وبتدفن حاجات زي دي
وبدأنا نحفر في قبر علي بس فجأه سمعنا صوت حد بيصوت وكان جاي من القبور اللي قدامنا، كنت هوقف حفر بس صاحبي قالي
_دول هما اوعي توقف لانهم لو حسو انك خايف قوتهم هتزيد وهياخدو روحك
فضلت احفر اكتر وشوفت حاجات غريبه خيالات سودا بتتحرك بسرعه وسط القبور ورجليا من الخوف تقلت عليا وكنت هقع علي الارض بس قاومت وكملت حفر وفعلا فتحنا القبر وكان صوت الصويت بيزيد اكتر واكتر
بس بعد ما حطينا العمله فيه الصوت اختفي وقفلنا القبر بسرعه، وكنا هنمشي بس سمعنا صرخه قويه اوووي من قبر ما نعرفش ايه ده، بس الراجل صاحب المدفن قالنا نمشي بسرعه ومالناش دعوه بأي حاجه بتحصل هنا..
_ ومشيت وكانت في اسئله كتيى جوايا بس هو عالم الجن كده جوااه اسئله والغاز كتير مستحيل نقدر نفهمها...
_واخيرا بعد ايام قضيتها في غذاب انتهت حكايتي مع العالم ده والحمد لله ما حصلتش حاجه تخوف تاني من وقتها بس خسرت كتير خسرت صحابي واللي عرفته انهم كانو ضعفااء اووي يعني لا صلاه ولا ايمان بربنا بالقدر المطلوب وده سهل وصول الكائينات المخيفه دي ليهم..
وبكدا خلصت حكايتي واتمني تعجبكم..
ــــــــــــــــــــــــــــــــــــــــ
#بقلم_الكاتبه_رحاب_القاضي
