روايه صاحب مفتاح الشقة الفصل الاول بقلم عمرو راشد
هذه الرواية متوفرة فقط على 👇
لمتابعه روايه صاحب مفتاح الشقة اضغط هنا 👇
(روايه صاحب مفتاح الشقة كاملة 👉)
مش عيب راجل زيك يغسل المواعين يابني
= عادي يا ماما فيها ايه؟ بساعد مراتي
" لقيت منال مراتي فجأه دخلت علينا المطبخ وقالت بعصبية
انت لسة مخلصتش؟
" تفتكر الجواز هو احسن قرار تاخده في حياتك؟،، اكيد لا ماهو انت لو هتقول اه يبقا انت لسة معرفتش حكايتي
هو انا كام مرة اقولك متغسلش الابيض مع الألوان
= يا حبيبتي ماهي كلها هدوم وهتتغسل محصلش حاجة يعني
دا بالنسبالك،، ولا نسيت البلوزة اللي باظت بسببك
= حبيبتي متنسيش ان دا دورك وأنا بعمل دا مساعدة ليكي مش أكتر
وانت كمان مش عايز تساعدني،، ليه يا امجد هو انت جايبني خدامة ليك ولا ايه؟
= الست بتعمل ل بيتها،، انا مقولتش تروحي تعملي في بيوت ناس تانية
دا انت بقيت بترد عليا كمان
= منال عشان خاطري كفاية خناق انا تعبت
والله دا انا اللي تعبت دي حياه بقت تقرف
" دا اقل موقف بيني وبين منال مراتي،، مراتي اللي اتجوزتها عن حب،، هي دي حياتي اللي انا عايشها كل يوم،، تفتكر بقا الجواز دا قرار صح ولا خطأ؟
منال احنا هنفطر عند امي بكرا
= لا يا امجد احنا هنروح عند ماما الاول وخلي طنط في يوم تاني
انا قولت ل ماما خلاص مينفعش نأجل
= وانت بتاخد قرار من غيري ليه؟،، هو أنا قولت اني هروح؟،، طب ايه رأيك بقا اني مش جاية معاك
انتي عايزة تخلي شكلي وحش قدام اهلي؟
= انت اللي عايز تخلي شكلك وحش،، كان لازم تقولي قبل ما تاخد أي قرار
معلش يا حبيبتي تعالي معايا بكرا و اوعدك نروح عند مامتك تاني يوم
= واشمعنا امك هي اللي تبقا الأول؟
مفيش سبب يا منال،، عادي يعني
= طالما هو عادي يبقا نروح عند امي
وامي اللي هتعمل الاكل بكرا دي اعمل فيها ايه؟
= والله دي مشكلتك انت
طب عشان خاطري نروح بكرا سوا و اوعدك انها تبقا اخر مرة
" لقيتها نفخت بضيق وسكتت لمدة دقيقة بالظبط بعدها اتكلمت وقالت
ماشي يا امجد انا هروح معاك وبعدها لينا كلام تاني
= اتفقنا
" السكوت هو أفضل حل ممكن تعدي بيه المشكلة بس المهم ان اللي قدامك ميفهمش ان سكوتك دا ضعف منك والاهم من دا كله انك متكونش بتسكت عشان فعلا انت ضعيف
بقولك ايه انا سمعت كلامك وجيت معاك لكن لو امك عملت الحركات بتاعتها دي انا مش هسكت زي كل مرة
= يا منال دي بتحبك والله
بتحبني اه،، انت متأكد من الكلام دا؟
= والله ماما بتحبك بس انتي مش فاهمة
عموما أنا قولتلك عشان متجيش بعد كدا وتلومني
= ربنا يستر
" إنتظار المشكلة والشعور اللي بتحسه وقتها بيكون اصعب من المشكلة نفسها،، انت قاعد على أعصابك و مستني اي حاجة تحصل وفي أي وقت
انتو جايين وقت الفطار يا امجد بدل ما مراتك تيجي تساعدني في تحضير الفطار
" اخدت نفس عميق ولسة هرد لكن منال سبقت و ردت هي
والله يا طنط اللي انا اعرفه ان حضرتك عاملة العزومة النهاردة ولو فعلا حضرتك مش قادرة يبقا مكنش لازم تعزمينا
" امي بصتلي بغضب وقالتلي
شايف مراتك بتكلمني ازاي
= يا ماما منال بتهزر
" منال ردت في اللحظة دي وقالت
بس انا مش بهزر يا امجد،، اللي مش قغد العزومة ميعزمش و أظن ان كلامي صح
#بقلم : #عمرو راشد
" حاولت أراضي امي عشان اعدي الموقف ونجحت في دا فعلا و امي حضرت الاكل وقعدنا ناكل وبعد شوية خلصنا وبقينا نتكلم و نضحك واحنا بنشرب الشاي وفي وسط الكلام امي قالت بهزار
انا عملت الاكل اهو،، دورك بقا يا منال تغسلي المواعين
" بس منال مكنش ينفع تعدي الموقف وتعتبره هزار وتسكت اكيد لا
انا لما ابقا في بيتي هغسل المواعين لكن دا مش بيتي اغسل المواعين ليه بقا
" ابتسمت ومسكت ايدها
يا حبيبتي متقوليش كدا،، بيت جوزك يبقا بيتك بالظبط
= ولما دا بيتك اومال اللي احنا عايشين فيه يبقا ايه؟
بيتي برضو يا حبيبتي بس دا الاصل.. هو دا اللي أنا اتولدت و اتربيت فيه
= امممم ومالو يا حبيبي
" كملنا كلام و فضلنا نحكي كتير لحد ما زهقت وقومت دخلت المطبخ وبدأت اغسل المواعين،، بس بعدها بشوية امي دخلت عليا واول ما شافتني اتخضت وقالت
يا نهار اسود أنت بتعمل ايه يا امجد؟
= ايه يا ماما بساعدك عشان انتي النهاردة تعبتي في تحضير الفطار
دا دور الست مش دورك يا امجد،، ليه مراتك متعملش اللي انت بتعمله دا؟
= عادي يا ماما مفيهاش حاجة،، بساعد مراتي برضو
يا امجد اللي انت فيه دا مينفعش وميرضيش ربنا
= يا ماما مساعدة مراتي دي حاجة اكيد ترضي ربنا
انت فاهمني كويس يا امجد،، انا مش عجباني حياتك مع منال،، شايفاك مش مرتاح
= لا يا ماما متقلقيش انا مرتاح،، منال كويسة وبتحبني وانا بحبها
لو مش مرتاح ياابني طلقها و ارتاح
= يا ماما بلاش الكلام دا،، انا مرتاح والحمدلله كل شئ كويس،، ادعيلي أنتي بس
" لقيت في اللحظة دي منال مراتي دخلت المطبخ وقالت بصوت عالي
انت لسة مخلصتش؟
= لا يا حبيبتي خلصت خلاص
برافو عليك،، ربنا يخليك ليا يا حبيبي
" امي ساعتها اتكلمت وقالت
وأنتي ليه متغسليش يا حبيبتي و لا انتي ايدك مقطوعة؟
= وأنا اغسل ليه وجوزي موجود؟ ليه اتعب نفسي؟
أنتي قولتيها بنفسك اهو،، جوزك يعني راجل يعني غسيل المواعين دا مش بتاعه،، دا بتاعك انتي ولا أنتي مش ست ولا ايه
= وهو لو أنتي تعبانة يا طنط هو مش هيساعدك؟
انا امه
= وأنا مراته
" تدخلت انا في الوقت دا وقولت
خلاص يا منال
" بعدها بصيت ل امي و قولتلها
هنستأذن احنا بقا يا ماما
= ربنا يعينك ياابني
" مشينا ونزلنا ركبنا العربية و رجعنا البيت،، طول الطريق منال ساكتة ومبتتكلمش وهي دي اللحظة اللي انا بقلق منها،، الهدوء اللي بيكون قبل العاصفة،، وصلنا البيت واول ما قفلت الباب و دخلت وراها لقيتها رمت الشنطة بتاعتها ووقفت قدامي و زعقت
انا قولتلك مش عايزة اروح،، عاجبك اللي حصل دا؟
= ما انتي برضو يا حبيبتي اللي رديتي عليها
اومال كنت عايزني اسكت ولا ايه؟،، اسكت عشان اسمع اهانتي وجوزي واقف يتفرج ومبينطقش
= دي امي يا منال يعني مينفعش اعمل حاجة
وانا مراتك والله،، انت مش جايبني من الشارع
= خلاص يا حبيبتي انا اسف متزعليش
متعصبنيش،، انت بارد كدا ليه ؟
= حبيبتي الموضوع مش مستاهل
لا مستاهل وانت لازم تجيبلي حقي
= اروح اضر*بها يعني ولا اعمل ايه؟
والله انا مليش فيه اتصرف
= منال انتي خدتي حقك و زيادة كفاية بقا
وانا قولت انه مش كفاية ولو مجبتليش حقي هسيبلك البيت و امشي
= لا يا منال،، انتي عارفة اني مقدرش اعيش من غيرك
لا خليك جنب امك،، روح خليك جنبها،، خليها تشوفلك عروسة تكون خدامة ليك وليها
= بلاش الكلام دا يا منال عيب كدا
بلا عيب بلا زفت بقا،، انا قولت اللي عندي وانت عارفني مبرجعش في كلامي،، يإما تجيبلي حقي يإما هسيب البيت وامشي وانت براحتك بقا
= وأنتي ايه اللي يرضيكي؟
امك تتصل وتعتذرلي
= يا منال دي ست كبيرة عيب
والله دا شرطي ولو مش عايز تنفذه براحتك انا مش هغصبك
= خلاص يا حبيبتي انا هنزل دلوقتي و هرجعلها وهكلمها انا بنفسي
مستنية،، بس ياريت متتأخرش لإني عايزة انام
" خرجت من البيت ونزلت ركبت العربية ومشيت،، كنت تايه مش عارف افكر،، مش عارف اعمل ايه،، انا متلخبط،، كنت في حالة صعبة أوي وانا لما بكون في الحالة دي مش بيكون عندي غير حل واحد،، اتجهت بطريقي ل الشقة اللي بفصل فيها عن اي حد وعن أي دوشة بتحصل حواليا،، روحت هناك بالفعل و فتحت الشقة و دخلت قعدت على الكنبة،، خمس دقايق ولقيت ناهد داخلة عليا وقعدت على رجلي
نورت بيتك يا سيد الرجالة
= وحشتيني يا بت
دا انت اللي واحشني اوي،، ينفع تغيب عن ناهد حبيبتك كل دا؟
= كنت مشغول شوية في الشغل
شكلك تعبان فعلا
= تعبان أوي والله
ولا يهمك انا دلوقتي هحضرلك الاكل وبعدها اعدل مزاجك ب رقصة حلوة
= انا مليش نفس للاكل،، عايزك ترقصيلي الاول
عنيا يا سيد الرجالة،، انت تؤمرني
= متتأخريش عليا
" عدت ربع ساعة لقيتها خارجة من أوضة النوم وهي لابسة بدلة ر*قص لونها احمر وشغلت مزيكا وبدأت ترقص قدامي،، أعتقد دا انسب وقت ممكن تنسى فيه الدنيا واي حاجة فيها،، ومش هنكر لو قولت انك ممكن تنسى اسمك كمان بس كل دا يتوقف على حاجة واحدة وهي انها تكون بتعرف ترقص حلو،، بعد شوية ناهد خلصت وقربت وقعدت جنبي وقالتلي وعنيها كلها حب
عارف يا امجد اني بعيش أسعد لحظات حياتي معاك،، من يوم ما اتجوزتني وانا حاسة اني عايشة في الجنة
= تخيلي بقا ان في غيرك مش مقدر النعمة اللي هو فيها
يبقا شكلها منال هي اللي عاملة فيك كدا
= زهقت منها
طب ما تطلقها يا امجد
= منال دي كنز كبير مينفعش يعدي من تحت ايدي
عشان فلوسها يعني؟
= الفلوس والشركة وحاجات كتير أوي
طب ما تفكر ازاي تاخدهم منها
= هيحصل بس كله في وقته
بس مش عايزاك تضايق نفسك،، انت امجد العطار ميهمكش اي حد
= وانتي تعرفي ان أمجد العطار بيسيب حقه؟
لا طبعا
= يبقا اطمني وقريب اوي كل حاجة تخص منال هتكون تحت ايدي ،، منال نفسها هتكون تحت سيطرتي!!
#عمرو_راشد
#صاحب_مفتاح_الشقة
#يتبع
