روايه فأعرضت نفسي الفصل العاشر 10 بقلم ايه شاكر
مبقتش عارفه دا واقع ولا أنا بهلوس ولا فيه إيه! اصطدم جسمي بالأرض بقـ.وة، وناديت بقلة حيلة وبصوت أقرب للهمس:
-روعه... عبيده.
(١٠)
#فأعرضتْ_نفسي
بقلم آيه شاكر
"مالك يا شهد... هما عملوا فيكِ إيه؟!"
قالتها روعه بنبرة قلقة وبلهفة وهي بتهز شهد وبتخبط على وجهها بخفه لكن شهد كانت استسلمت وقفلت عنيها..
"في ايه!!! انتوا بتعملوا ايه هنا؟!"
التفتت «روعه» لمصدر الصوت، كان عبيده بيبص ناحيتهم بذهول وجنبه «شادي»..
مردتش «روعه» عليه هي أصلًا مش عارفه هما بيعملوا إيه هنا!!
انحنى عبيده وتفحص شكل «شهد» والمكياج الصارخ اللي على وشها ولبسها اللي هي مخرجتش بيه الصبح..
شعر بانقباضة في قلبه وحط إيده على صدره برعب وقال موجهًا كلامه لـ روعه:
"إيه اللي هي لبساه ده وإيه اللي عامل فيها كده!!"
روعه بتلعثم:
"مـ.. معرفش والله ما أعرف!"
حاول عبيده يفوق شهد وهو بيقول بحده:
"يعني ايه متعرفيش انتوا مش كنتوا مع بعض؟"
تدخل شادي وقال بحسم:
"هو ده وقته يا عبيده شيل أختك خلينا نروح بيها على أقرب مستشفى"
شالها عبيده وخرج بيها فشاورت «روعه» على التاكسي اللي كان لسه واقف مستنيها وقالت:
"تعالى فيه تاكسي أهوه"
يصلها عبيده بشك وركب في المقعد الخلفي...
كانت شهد في المنتصف وعبيده على يمينها وروعه على شمالها وشادي ركب في المقعد الأمامي جوار السواق...
وانطلقوا بيها على المستشفى...
بقلم: آيه شاكر
استغفروا♥️
#كتابات_آيه_شاكر
#روايات_آيه_شاكر
★★★★
"متقلقيش يا ماما أنا مع شهد أصل تعبت شويه"
كانت روعه بتتكلم في الموبايل مع والدتها اللي قالت:
"عمك ومراته وابنه هنا وفرجوا أبوكي على المحادثات المتفبركه معرفش وصلتلهم إزاي وأبوكي حالف ما يرجعوا البلد إلا وهو كاتب كتابك على ابن عمك"
"إيه الجنان ده! بالله عليكِ حاولي تفهميه يا ماما إني معملتش حاجه! وبعدين أنا دكتوره هتجوز واحد كان بيعدي في الدبلوم بالعافيه ازاي!!"
"المهم دلوقتي باتي عند خالتك ولا روحي عند حد من أصحابك على ما أشوف إيه اللي هيحصل دا أبوكي متعصب جامد!"
"ماشي يا ماما نص ساعه وهكلمك أقولك هعمل ايه"
أنهت «روعه» المكالمه والتفتت لصوت الدكتور اللي بيقول لعبيده وشادي:
"واضح إنها تحت تأثير مخدر!"
عبيده بصدمه:
"مخدر!"
الدكتور برتابه:
"متقلقوش هي هتفوق لما مفعوله يخلص"
عبيده وشادي بصوا ناحية «روعه» اللي رجعت لورا وكأن سهام نظراتهم بتدفعها للخلف وكانت بتبص حوليها بنظرات حائرة ومرتبكه....
قرب «عبيده» منها وقال:
"اشرحيلي بقا إيه اللي حصل بالظبط"
بلعت ريقها وقالت بتلعثم:
"بـ... بص يا بشمهندس أنا معرفش حاجه لما شهد تفوق ابقى اسألها"
عبيده بحدة:
"وأنا هجيب صبر منين عشان أستناها لما تفوق!!"
شادي برجاء:
"يا أنسه لو سمحتي قولي لنا إيه اللي حصل!"
هزيت راسي بالنفي وأنا بقول بارتباك:
"أأا.. أنا معرفش حاجه عشان أقولها"
رن موبايل «روعه» تاني برقم والدتها فردت بسرعه عشان تهرب منهم لفت ظهرها وقالت:
"أيوه يا ماما"
ردت والدتها بهمس:
"أيوه يا قلب أمك اسمعيني..."
سحب «عبيده» الموبايل من روعه فشهقت وكانت لسه هتزعق فحط صوباعه على بوقه كإشاره ليها إنها تسكت وبدأ يكلم والدتها:
"ازيك يا طنط... أنا عبيده اخو شهد"
والدة روعه بخفوت أقرب للهمس:
"ازيك يا بشمهندس... عامل ايه؟"
"تمام الحمد لله... رحيم عامل ايه مش نازل أجازه قريب؟"
"بخير الحمد لله هينزل كمان يومين كده"
"يجي بالسلامه ان شاء الله"
سمع عبيده صوت زعيق والد روعه:
"قولي لبنتك تيجي حالًا بلاش شغل العيال ده"
"برن عليها أهوه بس موبايلها مغلق يا حج"
عقد عبيده بين حاجبيه وقال مستفهمًا بهمس وكأنه خايف والد روعه يسمع صوته:
"هو فيه حاجه ولا إيه؟!"
بعدت والدة روعه عن زوجها وقالت بهمس:
"معلش يا عبيده قول لروعه تروح لخالتها ولا تبات عند شهد أصل أبوها عرف بموضوع الرسائل ومتعصب على الأخر"
وقبل ما يسأل عبيده عن حاجه تاني قالت والدة روعه:
"معلش مضطره أقفل أمانه عليك تخلي بالك من روعه وخليها تقفل موبايلها"
"ماشي يا طنط متقلقيش"
بص عبيده لـ روعه وغض بصره بسرعه وبعدين مد ايده بموبايلها وقال:
"اتفضلي"
روعه بحده:
"إنت إزاي تاخد الموبايل مني كده!!"
تجاهل عبيده كلامها وعقب:
"والدتك بتقولك خليكِ مع شهد الليله واقفلي موبايلك"
بص عبيده على شادي وقال:
"يلا يا شادي روح وقف تاكسي خلينا نمشي من المستشفى دي"
"ماشي يا صاحبي"
دخل عبيده يجيب «شهد»...
وشعرت روعه بوغزات الدموع في عينها، دمعت وهي بتردد بقلق:
"وأنا كنت ناقصه عمي هو كمان!! استغفر الله العظيم يارب ربنا يهديك يا بابا"
والد روعه مش شخصيه سيئة هو بيحبها وبيخاف عليها لكنه حازم وصارم في بعض الأمور واللي في دماغه بينفذه..
مش عايز يعكر صفو علاقته بأخوه الكبير وشايف إن بنته هتكون بخير مع ابن عمها..
وأصلًا مش حابب إنها تتعلم ودايمًا يقولها البنت مسيرها لبيتها وجوزها، وإن الست اتخلقت عشان تخدم الراجل وتملى الجزء الفارغ في حياته وعشان كده كانت دائما تقول لنفسها طلما الجواز زي ما والدها بيقول هي مش هتتجوز أبدًا هي مش خدامه ومش هتقبل تكون أمْه لـ حد...
زمن العبيد انتهى والست إنسان زي الراجل ومن حقها تعيش وتتعلم وتحلم...
ضغط عبيده على «روعه» لحد ما حكتله هو ووالدته اللي شافته، واستنتجوا إنها كانت مكيده لـ «شهد» لكن قرروا الانتظار لحد ما شهد تفوق...
★★★★
في وقت السحر كان عبيده على سجادة الصلاة وفي كل سجدة يدعو لأخته لحد ما وصل لأخر سجدة في صلاة الوتر..
دعا لأخته ثم صمت ولم يقم من سجدته بل انطلق لسانه مرددًا:
"يارب أنت الأعلم بحال قلبي... يارب قلبي مش بإيدي لو مليش نصيب فيها شيلها من قلبي يارب... أو إجعلها من نصيبي واجعلي فيها الخير اللهم عاجلًا غير آجل... واهدي أختي يارب العالمين وارزق قلبها السكينة والأمان"
وعندما انتهى من صلاته طلع للبلكونه ولقى «روعه» واقفه لوحدها بتبص للسما..
"الجو برد عليكِ واقفه كده ليه؟"
دق قلبها بعنـ.ف وارتبكت لما سمعت صوته لأنها كانت لسه بتفكر فيه...
كانت قاعده في أوضته وهو ساب الشقه كلها وراح في الشقه اللي قصادها اللي كانوا مأجرينها وصاحبها سابها من كام يوم...
بصت روعه للبلكونه اللي جنبها، وقالت بنبرة مرتعشة:
"دا.. داخله أهوه"
وقبل ما تدخل سألها:
"متعرفيش شهد صحيت ولا لسه!"
"مش عارفه بس باين لسه نايمه"
قال بدون ما يبص ناحيتها:
"طيب ادخلي من البرد..."
لفت ظهرها ولسه هتدخل فقال عبيده:
"بقولك يا... فيه كيس سحلب في المطبخ هتلاقيه في الرف التاني ممكن تناوليهولي"
"حـ.. حاضر"
ابتسم عبيده وهو بيبص على مكانها الفارغ، مسح على ذقنه بارتباك وقال بهمس:
"يارب"
مجرد ما فتحت «روعه» باب أوضتها لقت الأوضه التانيه مفتوحه وسمعت صوت والدة شهد اللي حاضنه بنتها وبتحاول تهديها...
رجعت روعه بسرعه للبلكونه وقالت لـ عبيده بنبرة قلقة:
"شهد صحيت وشكلها منهـ.ار وبتعيط"
"طيب معلش هتعبك معايا افتحيلي باب الشقه"
★★★★
"إيه يا فراشه!! إيه بس يا حبيبتي؟!
الأم "حوريه":
"تعالى يا عبيده شوفها مش مبطله عياط"
دا كان رد أمي على أخويا اللي دخل الأوضه بخطوات واسعة وبقلق، بصيت لـ روعه اللي لابسه عبايتي وطرحتي وواقفه عند الباب وواضح على ملامحها الخوف والارتباك..
في الوقت ده حسيت إن ده كابوس!
أو إني أُصيبت بإحدى الأمراض النفسيه ودي هلاوس، أصل إيه اللي هيجيب «روعه» عندنا وكمان في الوقت ده!
حضني عبيده وأنا مسكت فيه وبكيت قلت بصوت متقطع ومرتعش:
"أنا تعبانه يا عبيده... تعبانه قوي"
عبيدة طبطب عليا وقال:
"سلامتك يا حبيبتي اهدي أنا جنبك"
بدأ يرتل آيات من القرآن لحد ما هديت وبدأت أفتكر اللي حصلي واحده واحده خرجت من حضنه وقاطعت قراءته وقلت:
"كانوا حاطينلي حاجه في العصير يا عبيده"
عبيده مستفهمًا:
"مين دول يا شهد؟"
انتبهت للبسي اللي أنا لسه بيه، وزعلت من نفسي جدًا إن عبيده شافني كده؟ نهرت نفسي وقولت أد إيه أنا أسوء بنت في الكون..
قلت بنبرة خجلة:
"شموع وشاب معرفهوش وكان معاهم منه"
تدخلت روعه وقالت بدهشه:
"منه!!! بس أنا مشوفتش منه!"
قلت بنحيب:
"ولا أنا بس سمعت صوتها... هو أنا مش متاكده لأني مكنتش في وعيي بس تقريبًا سمعت صوتها"
بصيت ناحية روعه وقلت بقلق وبدموع:
"هو أنا حصلي حاجه؟!"
روعه موضحة:
"لا يا شهد محصلش حاجه هما سابوكِ وهربوا"
تنفست بارتياح وقلت:
"الحمد لله دا أنا كنت هضيع"
عبيده:
"الصبح هاخدك ونروح لأهل البنت اللي اسمها شموع دي"
روعه:
"لـ.. لأ متاخدش شهد... اللي أعرفه إن شموع أهلها مسافرين بيشتغلوا بره وهي عايشه مع أخواتها... والشاب اللي كان مع شموع أخوها أصلًا"
مسح عبيده على وجهه عشان يداري غضبه وقال:
"لا حول ولا قوة إلا بالله... على الأقل هواجههم وأحذرهم يقربوا من أختي تاني"
روعه بقلق:
"بس متروحش لوحدك وخلي بالك لأني سمعت إنهم شباب مش تمام! يعني سمعت إنهم صايعين"
هز عبيده رأسه بتفهم من غير ما يبص ناحية روعه ورجع بصلي وقال بنبرة حادة:
"وإنتِ إيه اللي عرفك على الأشكال دي يا شهد!!"
"غلطه والله... غلطه أنا آسفه... مكنتش أعرف إنها بنت وحشه كده والله كنت هبعد عنها"
كل ده وأمي كانت بتسمع الحوار اللي بيدور، قربت مني كنت فاكراها هتحضني لكن لقيتها ضـ.ربتني بالقلم، حطيت إيدي على خدي وأنا ببكي فقالت أمي بحدة:
"القلم ده يمكن تفوقي لنفسك... إيه اللي إنتِ لبساه ده؟ وإيه اللي على وشك ده؟ أنا ربيتك على كده يا شهد؟"
قالت جملتها الأخيره وهي بتشاور على نفسها خجلت من نفسي أنا عمري ما عملت حاجه من ورا أهلي! عمري ما كنت بستخبى منهم زي الأيام دي!
رن في أذني كلام سما اللي معناه صحيح:
"طلما بتعملي كل حاجه في النور وقدام الناس يبقا مش حرام"
وأنا كنت ببحث عن الضلمه وبخبي عن أهلي، أنا فعلًا متربتش على كده!!
أنا اتربيت إن الحلال هو الصح والحرام هو الغلط، عقلي وتربيتي والبيئة بتاعتي غير «سما» و«شموع» تمامًا..
سما ظهرت في وقت كنت تايهه فيه وبدور على أي حد يمسك إيدي عشان أمشي وراه زي ما كنت ماشيه ورا «منه»
صفعة أمي فوقتني أكتر، وعرفت إني ضعيفه من كل الجوانب! شخصيتي ضعيفة لأبعد حد وإيماني بالله متزعزع لكني أخيرًا بدأت أفوق!!
★★★★
تاني يوم كان الجمعه، كنت عايزه أسمع الخطبة يمكن أروي بذرة الإيمان اللي جوايا وترجع تنبت من جديد..
روحت مع روعه للمسجد اللي كانت سرحانه وواضح على معالم وجهها الإرهاق من كثرة التفكير..
وقعدنا نسمع خطبة الجمعة:
‹‹ومن الناس من يعبد الله على حرف فإن أصابه خيرٌ اطمئن به وإن أصابته فتنة انقلب على وجهه خسر الدنيا والأخره ذلك هو الخسران المبين››
"كثير من الناس ضعيف الإيمان كثير الشك في عبادته، شبه بالحالِّ على حرف جبل في عدم ثباته «فإن أصابه خير» صحة وسلامة في نفسه وماله «اطمأن به وإن أصابته فتنة» محنة وسقم في نفسه وماله «انقلب على وجهه» أي رجع عن طريق الله وأخذ يتخبط في الضلال «خسر الدنيا» بفوات ما أمله منها «والآخرة» بضلاله عن سيبل الله «ذلك هو الخسران المبين».
كل حرف في الخطبه كان ليا وكأن الإمام يقصدني...
السيدات اللي في المسجد كانوا مستغربين من بكائي...
كنت بتسائل هل إيماني ضعيف للدرجة دي!!
أعرضت نفسي عن طريق الله وضللت الطريق وانتكست لما «منه» خذلتني بعدت عن ربنا بدل ما أقرب منه وأشكيله...
أضابتني فتنة فانقلبت على وجهي وكأني كنت بقرب من ربنا وبعبده عشان خاطر «منه» والأخوة والأخوات والعياذ بالله!
★★★★
لما خرجت من المسجد حسيت وكأن كان فيه جبل كان على قلبي وانزاح كنت الصراع اللي جوايا بدأ يخمد ويهدى لما قررت أتفقه في ديني وأقرب من ربنا أنا حيرانه عشان بعيده...
مريت على صيدلية عصام الليل لقيته واقف قدامها، ابتسملي وقال:
"ازيك يا شهد.. اتفضلي"
رديت باقتضاب وأنا باصه للأرض:
"الحمد لله... شكرًا"
انتبهت لروعه اللي ماشيه جنبي والمفروض انها بايته عندي من امبارح قولتلها بامتنان:
"شكرًا يا روعه إنك مسيبتنيش ولا لحظه من امبارح"
"إنتِ متعرفيش أنا بحبك إزاي يا شهد... بس للأسف أنا مش قاعده معاكِ بإراتي"
"مش فاهمه مين اللي غصـ.بك إوعى يكون عبيده!"
روعه بابتسامة:
"لا يا بنتي مش كده... فاكره لما قولتلك إن بابا عايز يجوزني ابن عمي..."
تنهدت بحزن وكملت:
"للأسف المحادثات حد بعتها لابن عمي أكيد هي «منه» يعني اللي عملت كده ودلوقتي عمي جاي من البلد وبابا حالف ما يرجع إلا وهو كاتب كتابي على ابنه"
رجع لي مرحي اللي فقدته لفتره طويله، قلت بضحك يمكن تخفف عن روعه:
"إوعي تكوني هربانه يا بت"
روعه بابتسامة مهزومة:
"حاجه زي كده"
قلت بجدية زائفة:
"لا لا أنا لازم أسلمك وإلا هكون كده متستره على هاربه"
روعه بمرح:
"لا ابوس إيدك ساعديني يا بنتي يساعدك ربنا"
ضحكنا ورجعنا للبيت...
قضيت وقت حلو مع روعه بنحكي ونتحاكي في كل حاجه ونهزر ونضحك على أي موقف اتمنيت وقتها إنها تقعد معايا للأبد وقلت يا سلام لو ينفع كنت اتبنيتها كأختي ...
بقلم: آيه شاكر
لا حول ولا قوة الا بالله العلي العظيم 🌹
★★★
وقبيل المغرب رن جرس الباب ودخل عبيده ومعاه شادي وكان باين عليهم متخانقين والظاهر إنهم مضـ.روبين..
اتخبينا في الأوضه وكنا بنسمع حوارهم..
عبيده بضحك:
"بس شوفتني وأنا بديله بالبونيه في وشه"
"وياريتني ما شوفتك... دا مسك إيدك ولواها وقعدت تصرخ"
ضحكوا وحط شادي إيده على خده وهو بيقول:
"العيال دول إيديهم تقيله أوي"
عبيده:
"معلش يا صاحبي حقك عليا"
شادي:
"أنا اتفاجئت... أصل أنا مش أد كده في الضـ.رب إنما أنا بصد كويس"
كمل وقال:
"أخدت بالك لما جه يضـ.ربني روحت مميل راسي وضـ.رب الهوا"
عبيده بضحك:
"اه وأخدت بالي برده لما جه واحد مسكك ووقفت بلا حول ولا قوة تاخد نصيبك"
شادي بضحك:
"بس شوفتني بقا وأنا بجري فوريره"
انفـ.جروا بالضحك وأنا وروعه بنكتم ضحكنا، لحد ما شافتهم أمي ضـ.ربت صدرها وقالت:
"يالهوي مين اللي عمل فيكوا كده يا ولاد!"
حاوط عبيده كتف أمي وقال بهمس:
"هوووش استري علينا يا أما؟"
سحبتُ «روعه» من إيديها ووقفنا قدامهم، فوقف عبيده يعدل هدومه وهو بيتنحنح بحرج،
قلت:
"إنت روحت لاهل شموع أكيد أومال لو مكنتش روعه محذراك إنهم صايعين"
عبيده بحمـ.اس:
"صايعين على نفسهم إحنا اتخانقنا معاهم وفرمناهم"
أمي بسخريه:
"أيوه يا حبيبي ما هو باين على خلقتكم"
ضحكنا كلنا وبصيت ناحية شادي إللي بصلي وبعدين بص للأرض بارتباك، قلت بحسرة:
"أنا آسفه والله.. أنا السبب"
وقبل ما يردوا رن جرس الباب فبرق عبيده عينه وبدل نظره بيننا وهو بيقول بخوف مصطنع ومرح:
"إيه ده إنتوا مستنين حد!"
بص عبيده لشادي وكمل:
"تفتكر يكونوا هما؟!"
شادي بثقة زائفة:
"دول يبقوا جاين لقضاهم أنا جاهز لصد اي ضـ.ربات جزاء"
ضحكنا وفتح عبيده الباب فظهر «والد روعه» اللي بص من فوق أكتاف عبيده للداخل ووجه كلامه لـ روعه:
"إنتِ فاكره لما تقفلي موبايلك وتستخبي عند صاحبتك مش هعرف أجيبك مثلًا!"
مسكت «روعه» في إيد أمي بخوف وكأنها بتستمد الأمان منها، فقالت أمي:
"متخافيش يا حبيبتي"
تنحى عبيده عن الباب وقال:
"اتفضل يا عمي"
والد روعه بجدية:
"معلش أنا مش جاي أتفضل أنا جاي أخد بنتي وأمشي"
روعه بخوف:
"والله يا بابا المحادثات والصور متفبركه أأ... أنا.."
قاطعها والدها:
"ولا كلمه لينا بيت نتفاهم فيه... يلا عشان عمك مستنينا"
سحبها والدها من إيديها فاضطرت تمشي معاه عشان متعملش جلبه...
كانت بتبص لـ عبيده وهي مستنياه يعمل حاجه لكنه مكنش في إيده حاجه...
وبعد ما مشيوا قلت بتوتر:
"اعمل حاجه يا عبيده إلحقها دا أبوها عاوز يجوزها لإبن عمها عشان حد بعتلهم صورها والمحادثات المتفبركه..."
نفخت بقـ.وة وكملت بضيق:
"ابن عمها ده أصلًا معاه شهادة دبلوم بالعافيه... إزاي دكتوره تتجوز واحد صنايعي ومعاه دبلوم!"
رنت جملتيي في أذن عبيده ففتح الباب عشان يلحقها ووراه شادي...
بقلم آيه شاكر
سبحان الله وبحمده سبحان الله العظيم ❤️🌹
★★★★
"لأ مش عايزه أتجوزه... مش عايزه أتجوز أصلًا اعملي حاجه يا ماما!"
بصت والدتها في الأرض وسكتت بقلة حيلة، قالت أم العريس:
"وإنت هتلاقي زي ابني فين! مش كفايه موافق بيكِ بعد اللي اتبعتله عنك"
"كدب والله كدب كل المحادثات متفبركه أنا معملتش حاجه"
والدة العريس:
"عملتي بقا ولا معملتش ابن عمك أولى بيك وبكره تحبيه"
وقفت روعه قدام والدتها وقالت بدموع ورجاء:
"لأ.. مش هتجوزه اعملي حاجه يا ماما عشان خاطري"
★★★
وقبل ما يبدأ المأذون في الإجراءات رن جرس الباب ودخل عبيده..
ولما شافته والدة روعة ابتسمت بفرحة...
عبيده كان واقف محتار ومش عارف يقول إيه حتى السلام منطقش بيه، بص لـ روعه اللي طلعت من أوضتها وابتسمت لما شافته، ورجع بص لوالدها وقال باندفاع:
"الصراحه يعني العريس ده مش لايق على روعه"
وقف العريس وقال بحده:
"وإنت مالك أصلًا بتتدخل ليه!!"
بص عبيده لـ شادي وقاله بهمس:
"بتدخل ليه؟ ارد أقول ايه؟!"
رفع شادي أكتافه لفوق كناية عن جهله، فبدل عبيده نظره بين الجميع اللي بيبصوله بنظرات حادة وكأنهم هيفترسوه، بلع ريقه وقال بدون تفكير:
"أأا.. أنا اللي روعه كانت بتكلمه يعني أنا وروعه كنا بنكلم بعض و... وبنحب بعض و.. وأنا جاي أتقدملها دلوقتي وإن موافقتوش هنمـ.وت نفسنا احنا الاتنين"
خبطه شادي في ذراعه ومال ناحيته وقال بهمس:
"إيه اللي انت بتقوله ده إنت شكلك أخدت على الضـ.رب ولا ايه!!"
عبيده بنفس الهمس:
"أنا بعك صح؟!"
شادي بهمس:
"إنت نيلت الدنيا"
وهنا لمعت فكره في ذهن روعه...
كسـ.رت الفاظه الزجاجيه وحطت قطعة حادة من الزجاج على إيديها وقالت:
"صح... هـ... همـ.وت نفسي وأرتاح كفايه ظلم"
بدل الد روعه نظراته بين عبيده وروعه، وبعدين اتنفس بعمق وبص للمأذون وقال:
"ابدأ الإجراءات يا مولانا..."
بص ناحية روعه وقال:
"سيبي البتاعه اللي في إيدك دي... هجوزهولك"
وقف عم روعه وقال:
"طيب وابني؟"
والد روعه:
"معلش ياخويا ياريت عندي بت تانيه كنت جوزتهاله... بس كل شيء قسمه ونصيب"
بلعت «روعه» ريقها بارتباك، مكنتش عارفه إيه اللي بيحصل! ما هي لو متجوزتش عبيده باباها مش هيسكت إلا لما يجوزها ابن عمها، وقف عقلها عن التفكير ووقفت تتابع باقي المشهد، قال المأذون:
"عايزين ٦ صور للعريس"
بحث عبيده في محفظته لقى أربعه وطلع شادي من محفظته صوره كمان لعبيده وأعطاهم للمأذون مع البطاقه...
المأذون بص لـ عبيده وقال:
"ناقص صوره يا عريس"
بحث «عبيده» في محفظته، وبعدين بص للمأذون وقال:
"طيب نخلص باقي الإجراءت وهجيبهالك بكره"
تدخلت أم روعه وقالت:
"إإ..استنى روعه كانت معاها صوره.. فين الصوره يا روعه"
روعه بدون تفكير:
"في الشنطة الرصاصي"
قال عبيده:
-لأ يا طنط... أنا عايز صوره ليا أنا مش لـ روعه!
الأم بتأكيد وهي بتدور في شنطة روعه:
"أيوه ما هي معاها صوره ليك"
بص عبيده لـ روعه وشاور على نفسه وهو بيقول بدهشه:
-معاكِ صوره ليا أنا!!!!!!
![](https://www3.0zz0.com/2024/05/26/06/919983638.jpg)
![](https://www3.0zz0.com/2024/05/24/17/749409247.jpg)
![](https://www12.0zz0.com/2024/05/23/19/529447582.jpg)