روايه خارج عن المألوف الجزء الثالث الفصل الاول 1
بقلم نشوه عادل
#خارج_عن_المألوف_الجزء_الثالث
- الاقصر ...عاوز تنقلنى الاقصر ي فندم اومال لو مكنتش اكفأ الظباط كنت هتودينى فين!
العميد منير: اهدى ي يزن واقعد عشان افهمك
يزن: من غير ما افهم ي فندم انا مش عاوز اروح الاقصر طب خلينا اول خط الصعيد مبلوعة لكن اخره ليه؟!
منير: ي ابنى افهم احنا باعتينك هناك مش عشان انك مش كفؤ والكلام الاهبل ده بالعكس احنا بننقلك واحنا واثقين انك هتقفل ملف القضايا دى
يزن بهدوء نسبى: قضايا ايه حضرتك؟!
منير: من فترة مش بعيدة ابتدت تحصل حوادث غريبة جدا ف الاقصر بالتحديد ف منطقة أرمنت وكلها حوادث مرعبة وغامضة
يزن باهتمام وشغف عكس التيار اللى كان دخل بيه: ازاى؟!
منير فتح الشاشة ع صور لناس مدمجة بصورهم بعد الحوادث وقال: ده بائع فاكهة اسمه مرتضى الشاذلى مات بسبب الدود اللى كان بيخرج من بوقه لحد ما ف*جر الرئتين واكل لحم وشه كله ....اما ده دكتور قاسم الفحيلى دكتور صيدلى مات بسبب برشامة فيه مادة سا*مة وده كهربائى اسمه عبدالله الخضير مات بسبب ان المروحة وقعت عليه وهى مكشوفة ع وشه لحد ما قط*عت شريان بالرئة وما*ت
يزن: تمام واضح انها كلها حوادث معروف اسبابها اهو ولا الطب الشرعى اكتشف حاجة مثلا؟!
منير: لا خالص
يزن : اومال ف ايه؟!
فتح منير صورة لبنت ف اواسط العشرينات كانت جميلة جدا ومحجبة وكأنها ليست مصرية لشدة جمالها وقال: دى خديجة رضوان الناس شهدت انها تواجدت مع كل المجنى عليهم فى نفس يوم الحادثة لكن بالنهار
يزن: مش فاهم برضه يعنى ايه؟!
منير: الكل شهد ان البنت دى بتدعى ع الناس دى دعوات والدعوات دى بتتحقق بنفس الطريقة اللى بتدعى بيها عليهم بيمو*توا بيها فعلا ومن هنا بدأ الشك اتجاهها
يزن بضحك: ليه ولية من اولياء الله الصالحين ايه الكلام الغريب ده ي فندم!
منير: انا كنت زيك مش مصدق بس شوف بقى الفيديو ده كده
فتح منير الفيديو الاول لخديجة مع مرتضى ودار الحوار بينهم
خديجة: انت ي راجل ي معدوم الضمير اشترى منك جوافة كلها دود اتقى الله
مرتضى : وانا كنت جواها مش انتى اللى منقياها بايديكى!
خديجة: ايوة بس انت اكيد عارف انها معيوبة وانا اقول اشمعنا انت الوحيد اللى بتبيعها بسعر اقل من سعر السوق النص
مرتضى: انتى عاوزة ايه؟!
خديجة: هكون عاوزة ايه يعنى عاوزة ارجعها واخد فلوسى
مرتضى: معندناش استرجاع ي شاطرة وبعدين ايه ضمنى انك متكونيش اكلتيهم وجاية ترمى بلاكى عليا
خديجة: هترجعهم بالذوق ولا لا!
مرتضى: لا مش مرجع حاجة واعلى ما فى خيلك اركبيه
خديجة بغضب: بنفس الدود اللى لقيته ف الجوافة هيطلع من بوقك بحجم اكبر وكميات اكتر تاكل لحم وشك متخليش الا العضم وتت*فجر رئتيك بسببها
رتيبة الام: خلاص ي بنتى سبيها ربنا ينتقم منه وخلاص
فتح فيديو تانى مع عبدالله الكهربائى عند محله ودار الحوار بينهم
خديجة: ي عم عبدالله ده كلام تركب المروحة اى كلام والوش يقع واختى معدية من جنبها ومش واخدة بالها عورتها ولولا ستر ربنا محدش عارف كان حصلها ايه!
عبدالله: بقولك ايه ي خديجة ع الصبح انتم رايحين جايبين مروحة اى كلام اصلا هو تقفيلها كده
خديجة: ي سلام طب ما احنا عندنا ٣ غيرها وشغالين كويس عادى
عبدالله: مليش فيه مش مشكلتى
خديجة بغضب: هتقع ع وشك المروحة وتق*طع لحم وشك وتتعذب بعدها تق*طع شريان برقب*تك وتم*وت
قفل منير الشاشة وقاله: ها ايه رأيك تفتكر مجرد صدفة!
يزن باستغراب: طب نتكلم بالعقل لو افترضنا انها وقعت المروحة ع وش الكهربائى وعطت للصيدلى البرشامة المسمومة جابت الدود ازاى للفكهانى ودخلته بوقه!
منير: انا عارف انك بتحب المغامرات ودى بقى مهمتك تعرف حقيقة اللى بيحصل
يزن: تمام ي فندم عن اذنك هروح اجهز نفسى
منير: ربنا معاك
بالفعل جهز يزن شنطته واتجه لمركز أرمنت بالاقصر وكان متجهز ليه شقة خاصة بالسكن راح حط شنطته ونزل ع طول راح ع القسم
يزن للعسكرى: اعطى خبر للمأمور ان الرائد يزن السعدنى برة
العسكرى: اتفضل ي باشا حضرت المأمور ف انتظارك
فتح ليه العسكرى الباب ودخل يزن وبعد ما سلم ع المأمور علاء
علاء: اكيد سيادة العميد عرفك القضية اللى انت جاى عشانها
يزن: ايوة بس كنت عاوز اعرف مين الظابط اللى كان ماسكها قبلى!
علاء: تسمع عن المقدم شريف المهدى!
يزن: مين فينا ميعرفوش ده مشهور عندنا بصقر الداخلية
علاء: بالظبط هو اللى كان ماسكها
يزن باستغراب: وراح فين؟!
علاء: اعتذر عن القضية ومش بس كده ده انا عرفت انه قدم استقالته نهائى من شغل الشرطة
يزن: غريب! طب واللى قبله؟!
علاء: الرائد فهد العزازى
يزن: وده برضه اعتذر!
علاء: لا ده حصلت معاه حادثة غريبة وبسببها فقد اطرافه الاربعة
يزن بشعور غريب: لا حول ولا قوة الا بالله ...طب بعد اذنك عاوز ملفات القضايا كاملة ع مكتبى
علاء: تمام هبعتهالك مع العسكرى حالا
يزن: شكرا لحضرتك ي فندم عن اذنك
دخل يزن ع مكتبه وبعدها دخله العسكرى الملفات بالفيديوهات والصور بعد مرور ست ساعات كاملة خرج يزن للعسكرى: بقولك ايه هو الطب الشرعى اللى هنا فين؟
وصفله العسكرى المكان وبعدها اخد يزن تاكسى ووصل ع هناك وطلب يقابل الدكتور وليد ابو العز وقابله
وليد: اهلا ي فندم حضرتك الظابط الجديد مش كده !
يزن: ايوة
وليد:خير اقدر اساعدك ازاى؟!
يزن: انا قرأت التقارير اللى حضرتك بعتها ولاحظت ف المكتوب ان دايما بيكون فيه علامة موجودة ع الجثث بحرف D ووووو......
لمتابعه باقي فصول الرواية اضغط هنا 👇
(روايه خارج عن المألوف الجزء الثالث )
