روايه صاحب مفتاح الشقة 2(العهد) الفصل العاشر 10
بقلم عمرو راشد
اخبار غادة ايه يا أمجد؟ ومنال مراتك؟ فاكرها؟
" مكنتش عارف ارد عشان سببين أولهم اني مكنتش قادر اتكلم وكأن في حد ماسك لساني والتاني هما ان الاتنين اللي بتسألني عنهم دول ما*تو،، السؤال دا كان خارج من شيرين بعدها صلاح قرب ووقف جنبها وهو بيضحكلي وقال
كل حاجة عملتها هتتردلك تاني يا أمجد،، حق منال وهالة انا مش هسيبه،، حتى امهم الست الغلبانة اللي انت مرحمتهاش،، محدش فينا عملك حاجة بس انت اللي مغرور وشايف نفسك اعلى من البشر كلهم و دي اخرتك،، انت هتصحى مش فاكرنا يا أمجد
" الرؤية بدأت متبقاش واضحة،، كل حاجة بتختفي من قدام عيني عشان اصحى الاقي شيرين نايمة جنبي بشكل طبيعي جدا ومفيش اي حاجة في الأوضة،، قومت ساعتها وأنا دماغي هتنف*جر من التفكير،، في حاجة غلط بتحصل،، اللي شوفته دا مش حلم دي حقيقة،، بس ازاي،، اكشفها ازاي؟،، دخلت الحمام عشان اغسل وشي،، وأنا بغسله و برفع وشي قدام المرايا اتفاجأت بنفس الجملة اللي مكتوبة باللون الأحمر
" احذر غدر اقرب الناس إليك يا ابن العطار "
" تلقائيا بدأت اعلي صوتي وقولت
انا مش فاهم،، فهمني انت ايه اللي بيحصل حواليا
" فجأه النور اتطفى و الدنيا كلها ضلمت رغم أننا كنا الصبح وفي عز النهار وشوفت الكيان الاسود تاني بس كان واقف بعيد عني،، بدأت انا أتكلم معاه
ارجوك قولي أي حاجة،، انا تايه ومش فاهم اللي بيحصل
" مكنش بيرد عليا ومكتفي بالنظر والسكوت فقط،، الوضع استمر دقيقة بالظبط وبعدها كل حاجة رجعت زي ما كانت،، لكن قبل ما اخرج من الحمام لاحظت حاجة بتتكتب على المرايا،، كلمة من اربع حروف مكتوبة باللون الأحمر والكلمة دي هي
ياسر
" ياسر هو اللي عنده السر اكيد،، دخلت لبست بسرعة و لقيت شيرين صحيت وبتقولي
رايح فين يا حبيبي؟
= مشوار صغير و راجع
طب مش هتفطر الاول؟
= خلي كل حاجة لما ارجع
انت حتى ملحقتش ترتاح من رجوعك من البلد اللي كنت فيها دي
" بصيتلها وهي ورايا وابتسمت
هنرتاح قريب،، كلنا هنرتاح يا شيرين
" لو ملقتش رد عند ياسر يبقا اكيد الرد عند شيرين لاني مقولتش انا رايح فين لما سافرت،، مقولتش لأي حد يبقا ازاي هي عرفت؟،، يا ويلك يا شيرين لو الغدر كان منك أنتي،، بعد ما نزلت اتجهت بسرعة على الحارة من تاني وتحديدا عن القهوة،، نزلت من العربية و روحت سألت القهوجي
تعرف القسم ولا المكان اللي ياسر موجود فيه؟
= اعرفه طبعا يا مولانا بس هو انت محتاجه في حاجة ضرورية يعني؟
وانت مال اهلك،، خليك في حالك
= يا مولانا أنا قصدي اخدمك والله،، ياسر دلوقتي ورا الحديد يعني مش هيعرف يعملك حاجة
رد على سؤالي ومن غير رغي كتير،، تعرف مكان ياسر؟
= هقولك
" من حسن حظي انه كان لسة مترحلش على النيابة،، روحت القسم وطلبت اقابله كأني واحد من قرايبه وفعلا بعد محاولات مع الظابط وافق و خرج ياسر من الحبس عشان يجيلي وبعدها سابنا لوحدنا
شوفت اللي حصلي يا مولانا؟،، انا اتبهدلت من بعدك
= وانا جاي عشان ارجع حقك،، متعرفش مين اللي عمك فيك كدا؟
وحتى لو اعرف هيفيد بإيه،، انا هيتحكم عليا مش اقل من 15 سنة
= لو قولتلي اي حاجة تساعدني مش هخليك تتسجن سنة واحدة حتى
ازاي؟
= من غير ما تسأل يا ياسر،، انت بتكلم مولانا المهدي يعني المفروض سؤال زي دا ميكونش جوا دماغك اساسا
انا اخويا ما*ت يا مولانا،، نبيل ما*ت
= لا حول ولا قوة الا بالله،، عشان كدا انا حلمت بيه يبقا الحلم كان حقيقي
حلم ايه؟
= حلم الجنة اللي حلمته ل اخوك،، انا حلمت ان اخوك جوا الجنة وواقف بعيد وبيشاورلك عشان تجيله وتكون معاه
وانا روحت؟
= لو كنت روحت مكنش زمانك بتتكلم معايا دلوقتي لانك هتكون م*يت
انت بتتكلم بجد يا مولانا؟ يعني انا اخويا في الجنة؟
= اخوك ما*ت شهيد يا ياسر،، نبيل الله يرحمه ما*ت وهو مريض،، وانت عارف ان اللي بيمو*ت مريض أو مقتو*ل او غريق بيكون شهيد،، اخوك داخل الجنة من اوسع ابوابها،، داخلها من غير حساب،، وتخيل انه هيسحب معاه للجنة 70 شخص من قرايبه اللي بيحبهم وعايزهم يكونو معاه،، يعني انت واحد من اللي داخلين الجنة يا ياسر وعلى حسب الحلم اللي انا حلمته،، اخوك كان بيشاورلك يعني عايزك معاه،، ابشر يا ياسر وافرح
يا كريم يارب،، الحمدلله،، انا والله ما مصدق نفسي يا مولانا،، ربنا يباركلك و يطول في عمرك اكتر واكتر
= انا موجود عشان الناس تكون مبسوطة يا ياسر،، عشان الناس تعيش مرتاحة بس بشرط انهم يبقو تحت امري،، ينفذو اي حاجة بطلبها منهم ومقابل دا هيكون ليهم شأن عظيم جدا في الدنيا والاخرة
وانا تحت امرك وهعمل كل اللي تقولي عليه
= مين اللي عمل فيك كدا؟
انا والله ما اعرف،، انا كنت قاعد في البيت لقيت عيل من الشارع جه خبط عليا وقالي في ناس عايزاك على القهوة،، نزلت تحت اشوف مين بس ملقتش حد،، لما رجعت البيت تاني لقيت شنطة الحشي*ش و ساعتها البوليس جه وملحقتش اتصرف
= يعني اللي عمل كدا عملها وانت في الشارع اكيد
اكيد يا مولانا
= محاولتش تعرف مين؟
فاكر الراجل اللي احنا روحنا عنده البيت و ضر*بناه؟
= مين دا؟
يا مولانا الراجل اللي كان مع الرقا*صة،، لما بعتلي العنوان عشان اجيلك لو حصل حاجة
= قصدك صلاح؟
تقريبا هو دا،، واحد من الرجالة وهو بيشوف كاميرات السايبر اللي قدام البيت شاف صلاح وهو طالع عندي
= والراجل دا يعرفه منين؟
ماهو كان معانا في الخنا*قة يعني اكيد لسة فاكره
= يعني صلاح اللي عملها
باين
" كنت حاسس ان الوسا*خة دي متطلعش غير منه بس كان لازم اتأكد عشان لو مكنش هو اللي عملها كنت هفتح على نفسي باب كبير لكن صلاح هو اللي سهلها عليا وفتح الباب،، بعد ما خلصت الزيارة فضلت في الشارع باقي اليوم ومرجعتش البيت،، رجعت البيت الساعة 10 بالظبط عشان الاقي سمية وصلاح وشيرين و جنبهم جثة ملفوفة ومن الواضح انها غادة، ابتسمتلهم وقولت
اهلا،، طبعا مستغربين انتو متجمعين ازاي بس الحقيقة اني أنا اللي جمعتكم دلوقتي،، عقبال ما تتجمعو في جهنم
" شيرين اتنفضت من مكانها وقامت وقالتلي
امجد الحقني الناس دي جاية تأذ*يني،، انا مليش ذنب
" سمية ردت عليها
يا بنت الكل*ب أنتي هتبعينا دلوقتي،، انتي صاحبة الفكرة من الاول،، انتي اللي بدأتي الموضوع دا كله
" بعدها سمية بصت ليا وقالتلي
متصدقهاش يا أمجد دي هي اللي قت*لت حتى البت دي،، احنا ملناش ذنب في اي حاجة
= حقيقي اللحظة دي حلوة أوي،، مستمتع جدا وانا شايف كل واحد فيكم بايع التاني،، خليني الأول احكيلكم الموضوع دا بدأ ازاي،، الموضوع بدأ لما خلصت زيارة ياسر
" بصيت ساعتها ل صلاح
عارف ياسر طبعا يا صلاح،، ياسر اللي انت حطيت في شقته شنطة الحشي*ش
" الصراحة كنت مكسل اروح لكل واحد فيكم بيته وعشان كدا قررت اجمعكم عن طريق اني اشتريت خط جديد مش متسجل وبعت رسالة ل صلاح
" صلاح انا شيرين و دا رقمي الجديد،، الرقم دا هو اللي هنتواصل عليه دايما عشان أمجد بدأ يشك فيا،، احنا النهاردة عايزين نكرر اللي حصل في أمجد تاني،، هو حاليا نايم،، انا حطيتله الحباية ونام،، هات سمية وغادة وتعالو بسرعة،، الساعة 10 تكون عندي
" بعدها بصيت ل شيرين وقولتلها ب عتاب
عملتي كدا ليه يا شيرين،، انتي كنتي فاكرة نفسك هتعرفي تخدعيني،، شيرين انا أمجد العطار،، ازاي الفكرة تجيلك أصلا
= يا أمجد أنا والله عملت كدا عشان بحبك،، ايوا انا اللي روحت ل فاتن وقولتلها انك متجوز عشان تبعد عنك لإني بحبك ومش هستحمل تتجوز واحدة غيري بعدها لقيتك باعت واحدة عشان تقت*لني،، انت اللي بدأت بالغدر يا أمجد مش انا
الغدر هو انك تعملي حاجة من ورا جوزك،، الغدر انك تبقي عايزة تخربي كل ترتيباتي
= أمجد أنا اسفة و اوعدك دا مش هيتكرر تاني والله،، انا هبقا تحت رجلك ولو عايز تتجوز اتجوز بس متعملش فيا حاجة
" سمية ردت في الوقت دا
متصدقهاش دي هي اللي كانت السبب في كل حاجة،، دي كانت عايزة تقت*لك،، هي اللي حطت ليك الحباية في كوباية المية اللي شربتها قبل ما تنام،، الخلابة اللي انت كنت بتستخدمها معايا ،، هي اللي كلمت زينب ودفعتلها فلوس عشان تعرف منها اسم المخد*ر اللي كانت بتستخدمه،، شيرين كانت عايزة تجننك يا أمجد،، انا مليش دعوة،، سيبني امشي وأنا مش هقربلك ولا هتشوفني تاني
" ابتسمتلها وسكت ثواني قبل ما ابص ل صلاح واقوله
وانت يا صلاح معندكش حاجة تقولها؟،، مش هتدافع عن نفسك؟
= انا لو اطول اقت*لك الف مرة هعملها يا أمجد،، هعملها عشان اجيب مراتي
مش مكفيك اللي عملته فيك،، لسة مش عايز تهدى،، لسة بتعاند وعايز تقف قدامي
= و طول حياتي هفضل عايش بس عشان اقت*لك
انت غبي يا صلاح،، صدقني والله انت غبي جدا وغبائك دا مش هيخليك تعيش اصلا
" بصيت ل شيرين بعدها وقولتلها
عملتي ايه في غادة؟
" فضلت ساكتة ومبتردش عليا لحد ما كررت السؤال بصوت اعلى وهنا كانت بتترعش وبدأت تتكلم
انا لقيتها جاية البيت وقالتلي أنها من طرفك وجاية عشان توصل رسالة
فلاش باك
طب وأمجد متصلش هو ليه؟
= أنتي عارفة ان أمجد مش فاضي،، أمجد وراه حاجات كتير مهمة وهو بعتني ليكي عشان كدا
وايه هي الرسالة دي؟
= أنتي مالك مخضوضة ليه كدا؟
معلش اصل انا مستغربة
= مفيش استغراب ولا ححاجة وعموما هو قالي انه هيتصل بيكي عشان يفهمك كل حاجة
اممم ماشي
= طب مش هتقومي تعمليلنا حاجة نشربها بقا؟
طبعا حاضر،، ثواني
" دخلت المطبخ ساعتها وأنا جوايا الف سؤال وهو انت ليه عملت كدا المرادي،، مكنتش فاهمة خصوصا اننا متفقين انك لو عايز تقولي هتقولها بنفسك مش هتبعت حد،، لحد ما حسيت بحد واقف ورايا،، وساعتها خدت السك*ينة اللي كانت قدامي بسرعة وغرزتها في قلبها،، وقعت قدامي على بيت ولقيت معاها سكي*نة برضو وعرفت ساعتها انك ناوي على الغدر،، مكنتش عارفة اتصرف ازاي ولا اروح فين لحد ما جاتلي فكرة التلج،، نزلت اشتريت الواح تلج وبدأت أكسرها و احطها عليها،، كنت عارفة انك اول ما تعرف مش هتسيبني وعشان كدا كان لازم أنا اللي اقت*لك الأول،، واتصلت بالرقم التاني اللي انت كنت بتخليني ابعتله فلوس و قابلت زينب،، ست بسيطة جدا خدت مني 10 الاف جنيه عشان تقولي كل حاجة عنك،، وساعتها عرفت سمية وصلاح و روحتلهم واتفقت معاهم على كل حاجة،، هنحطلك حباية المخد*ر ونبدأ نلعب بيك ونجننك الأول و بعدها نقت*لك
بااااك
" ساعتها سقفت بإيدي وانا مبتسم ليها
ايه دا؟،، تخطيط عظيم،، والله تستاهلي جايزة يا شيرين،، انتي تستاهلي تكوني مرات أمجد العطار فعلا
= تعالى ننسى اللي فات يا أمجد ونبدأ من جديد وأنا صدقني مش هعمل أي حاجة تاني
قبل ما ننسى اللي فات لازم تكملي الحكاية،، عملتي ايه في ياسر و ازاي عرفتي طريقه؟
= سمية كانت عندها علاقات وهي اللي جابت خط سير العربية من المرور و لاحظنا انك بتروح المكان دا كتير،، وصلاح لما راح هناك وسأل عنك عرف انك عملت هناك شعبية كبيرة والناس بتحبك و ان دراعك اليمين هو ياسر وعشان كدا قررنا نخلص منه
انا مبهور بيكم يا شيرين،، خطة كاملة وتنفيذ بإتقان،، عظيم
= أمجد انسى اللي فات عشان خاطري وتعالى نبدأ من جديد
عشان نبدأ من جديد لازم القديم ينتهي يا شيرين،، ينتهي بكل حاجة فيه سواء حلوة او وحشة
= أمجد...
" في لحظة وقبل ما تكمل جملتها كنت خرجت السكي*ينة من جيبي و جرحت بيها صلاح و سمية،، هما الاتنين وقعو على الأرض ولكن كانو لسة عايشين
هو دا الوحش يا شيرين اما انتي الحاجة الحلوة عشان كدا انا عايز اكافئك،، انتي تستاهلي مكانة كبيرة،، تستاهلي تكوني مرات أمجد العطار
" فتحت دراعي عشان تدخل في حضني وفعلا بعد ثواني ابتسمت ليا ودخلت في حضني عشان بعدها اعمل جرح في ضهرها بالس*كينة اللي في ايدي،، سيبتها ووقعت على الأرض ووقفت شايفهم قدامي هما التلاتة وهما واقعين ومش قادرين حتى يتحركو
هو دا عقابكم وعقاب أي واحد هيقف قدام أمجد العطار،، انا متخلقتش عشان اكون بني آدم عادي،، انا اتخلقت عشان اكون عظيم وليا شأن،، أما البشر اللي شبهكو ملهمش لازمة عشان ضعفاء والضعيف عمره ما هيعيش،، وعشان كدا انا قررت ارحمكم من الدنيا ومن وجع الجر*ح اللي انتو حاسين بيه دلوقتي
" كان معايا ازازة فيها بنزين بدأت ارميها في كل مكان في الشقة وبعدها فتحت الولاعة و رميتها على الأرض،، الشقة كلها بدأت تولع وشوفت صلاح وشيرين وهما بيحاولو يبعدو عن النار أما سمية حركتها كانت سكتت تماما لان باين أنها ما*تت،، خرجت من الشقة وقفلتها بالمفتاح ونزلت ركبت العربية ومشيت
" انا مينفعش حكايتي تنتهي،، انا أذكى من الكل وأعلى منهم،، انا عملت اللي كل البشر تعجز تعمله،، كل حاجة في االدنيا لازم تمشي زي ما انا عايز،، كل الناس لازم تكون تحت امري،، المقتبل بسيط،، تخيل حد يطلب منك خدمة وفي المقابل هتدخل الجنة،، حلم أي شخص،، ومش مطلوب منك كتير انت عشان تعرف تلعب بأي شخص ركز على مشاعره وعواطفه،، البشر عواطفهم اللي بتحركهم مش مخهم،، لو قدرت تفهم دا هتكون انت مولانا بجد،، واخيرا متفكرش انك مش هتسمع عني تاني،، انت هتسمع عني كتير الفترة الجاية،، ممكن تشوفني في احلامك،، هبقا جوا دماغك،، متثبت جوا عقلك،، هتشوفني في وشوش الناس اللي هتقابلها،، بس لما تشوفني اكيد انت عارف هتقول ايه، فاكر؟،، " انا اختارت الجنة،، انا مع مولانا المهدي صاحب مفتاح الشقة جنة الانسان على الأرض "
لمتابعة باقي فصول الرواية اضغط هنا 👇
(روايه صاحب مفتاح الشقة 2 (العهد))
تمت.....
